കേശു ഈ വീടിന്റെ നാഥൻ ഒടിടി റിലീസ്; മോഷൻ പോസ്റ്റർ ഇതാ..!

ജനപ്രിയ നായകൻ ദിലീപ് നായകനായി എത്തുന്ന കേശു ഈ വീടിന്റെ നാഥൻ എന്ന ചിത്രം ഒടിടി ഉറപ്പിച്ചു. ഡിസ്‌നി പ്ലസ് ഹോട്ട് സ്റ്റാറിൽ ആണ് ഈ ചിത്രം സ്ട്രീം ചെയ്യുന്നത്. ഈ വരുന്ന ക്രിസ്മസിന് ആയിരിക്കും ഇതിന്റെ സ്ട്രീമിങ് എന്നാണ് സൂചന. ഈ വിവരം പ്രഖ്യാപിച്ചു കൊണ്ടാണ് ഇന്ന് ഈ ചിത്രത്തിന്റെ ഒരു മോഷൻ പോസ്റ്റർ പുറത്തു വിട്ടത്‌. നാദിർഷ സംവിധാനം ചെയ്തിരിക്കുന്ന ഈ ചിത്രത്തിൽ ഉർവശി, നസ്ലിൻ എന്നിവരും പ്രധാന വേഷങ്ങൾ ചെയ്യുന്നുണ്ട്. മോഷൻ പോസ്റ്ററിലും ഇരുവരേയും നമ്മുക്ക് കാണാൻ സാധിക്കും. ഈ ചിത്രത്തിലെ ഏതാനും പോസ്റ്ററുകളും ഇതിലെ ദിലീപ് ആലപിച്ച ഒരു ഗാനവും നേരത്തെ റിലീസ് ചെയ്യുകയും വലിയ ശ്രദ്ധ നേടുകയും ചെയ്തിരുന്നു. നാദിർഷ തന്നെ രചിച്ചു ഈണം പകർന്ന നാരങ്ങാ മിട്ടായി എന്ന ഗാനമാണ് ദിലീപ് ആലപിച്ചു പുറത്തു വന്നു സൂപ്പർ ഹിറ്റായത്. ഈ ചിത്രത്തിലെ ദിലീപിന്റെ ലുക്ക് സോഷ്യൽ മീഡിയയിൽ വലിയ രീതിയിൽ പ്രചാരം നേടിയിരുന്നു.

ഒരു ഫാമിലി കോമഡി എന്റർടെയ്നർ ആയി ഒരുക്കിയിരിക്കുന്ന ഈ ചിത്രത്തിന് തിരക്കഥ രചിച്ചിരിക്കുന്നത് തൊണ്ടിമുതലും ദൃക്‌സാക്ഷിയും പോലത്തെ മികച്ച ചിത്രം രചിച്ച സജീവ് പാഴൂർ ആണ്. ദിലീപും ഡോക്ടർ സക്കറിയ തോമസും കൂടി നിർമ്മിച്ച ഈ ചിത്രത്തിന് ക്യാമറ ചലിപ്പിച്ചത് അനിൽ നായരും എഡിറ്റ് ചെയ്യുന്നത് സാജനുമാണ്. മുകളിൽ പറഞ്ഞ നടീനടൻന്മാരെ കൂടാതെ കലാഭവൻ ഷാജോൺ, ഹരിശ്രീ അശോകൻ, കോട്ടയം നസീർ, ഹരീഷ് കണാരൻ, ജാഫർ ഇടുക്കി, അനുശ്രീ, സ്വാസിക എന്നിവരും കേശു ഈ വീടിന്റെ നാഥനിൽ അഭിനയിച്ചിട്ടുണ്ട്. അമർ അക്ബർ അന്തോണി, കട്ടപ്പനയിലെ ഹൃതിക് റോഷൻ, മേരാ നാം ഷാജി എന്നിവക്ക് ശേഷം നാദിര്ഷ ഒരുക്കിയ ചിത്രമാണ് കേശു ഈ വീടിന്റെ നാഥൻ. ഇത് കൂടാതെ നാദിർഷ ഒരുക്കിയ ജയസൂര്യ ചിത്രമായ ഈശോയും ഒടിടി റിലീസ് ആയിരിക്കും എന്ന് വാർത്തകൾ വരുന്നുണ്ട്.