കെജിഎഫിനെ തകർത്ത് കാന്താര

ഇന്ത്യൻ സിനിമ ഒന്നടങ്കം ചർച്ച ചെയ്ത കൊണ്ടിരിക്കുന്ന കാന്താര ഇപ്പോൾ മലയാള സിനിമാ പ്രേമികളും ഇരു കയ്യും നീട്ടി സ്വീകരിക്കുകയാണ്. കഴിഞ്ഞയാഴ്ച റിലീസ് ചെയ്ത ഇതിന്റെ മലയാളം പതിപ്പ് വമ്പൻ വിജയമാണ് നേടുന്നത്. പൃഥ്വിരാജ് പ്രൊഡക്ഷൻസാണ് ഈ ചിത്രം കേരളത്തിൽ വിതരണം ചെയ്തിരിക്കുന്നത്. റിഷഭ് ഷെട്ടി രചനയും സംവിധാനവും നിര്‍വ്വഹിച്ച് കേന്ദ്ര കഥാപാത്രത്തെയും അവതരിപ്പിച്ച ഈ ചിത്രം നിർമ്മിച്ചിരിക്കുന്നത് കെ ജി എഫ് സീരിസ് നിർമ്മിച്ച ഹോംബാലെ ഫിലിംസാണ്. ഇപ്പോഴിതാ ഹോംബാലെ ഫിലിംസിന്റെ ചരിത്രത്തിലെ തന്നെ, കർണാടകയിൽ ഏറ്റവും കൂടുതൽ പ്രേക്ഷകരെ ലഭിക്കുന്ന ചിത്രമായി കാന്താര മാറിക്കഴിഞ്ഞു. ഈ വിവരം ഒഫീഷ്യലായി അവർ തന്നെ പുറത്ത് വിടുകയും ചെയ്തിട്ടുണ്ട്. ഇതിനോടകം 80 ലക്ഷത്തിലധികം കാഴ്ചക്കാരെയാണ് കർണാടകയിൽ നിന്ന് മാത്രം ഈ ചിത്രത്തിന് ലഭിച്ചത്. 75 ലക്ഷത്തോളം കാഴ്ചക്കാരെ അവിടെ നിന്ന് നേടിയ പ്രശാന്ത് നീൽ- യാഷ്- ഹോംബാലെ ചിത്രമായ കെജിഎഫ് 2 ന്റെ റെക്കോർഡാണ് കാന്താര തകർത്തത്.

പ്രേക്ഷകരും നിരൂപകരും ഒരേ സ്വരത്തിൽ ഗംഭീരം എന്ന് വിശേഷിപ്പിക്കുന്ന ഈ ചിത്രത്തിന്‍റെ കഥ കന്നഡ മിത്തുകളെ അടിസ്ഥാനമാക്കിയാണ് ഒരുക്കിയിരിക്കുന്നത്. സപ്തമി ഗൌഡ, കിഷോര്‍, അച്യുത് കുമാര്‍, പ്രമോദ് ഷെട്ടി, ഷനില്‍ ഗുരു, പ്രകാശ് തുമിനാട്, മാനസി സുധീര്‍, നവീന്‍ ഡി പടീല്‍, സ്വരാജ് ഷെട്ടി, ദീപക് റായ് പനാജി, പ്രദീപ് ഷെട്ടി, രക്ഷിത് രാമചന്ദ്രന്‍ ഷെട്ടി, പുഷ്‍പരാജ് ബൊല്ലാറ എന്നിവരും വേഷമിട്ട ഈ ചിത്രം ആഗോള തലത്തിൽ നൂറ് കോടിയും കടന്ന് ബോക്സ് ഓഫീസിൽ കുതിക്കുകയാണ്. ഈ ചിത്രത്തിന് മറ്റു ഭാഷകളിലും വമ്പൻ സ്വീകരണമാണ് ലഭിച്ചു കൊണ്ടിരിക്കുന്നത്.