അന്യൻ, ശിവാജി, സച്ചിൻ എന്നീ ചിത്രങ്ങളിലെ നായികമാർക്ക് ശബ്ദം നൽകിയത് മലയാളത്തിലെ പ്രശസ്ത നടി…

തെന്നിന്ത്യൻ സിനിമയിലെ പ്രശസ്ത നടിമാരിലൊരാളാണ് കനിഹ. മലയാളം, തമിഴ് സിനിമകളിലൂടെ സിനിമാ പ്രേമികളുടെ മനസ്സിലിടം പിടിച്ച ഈ നടി മലയാള സിനിമയിൽ മിന്നുന്ന പ്രകടനമാണ് കാഴ്ച വെച്ചിട്ടുള്ളത്. പഴശ്ശി രാജയും സ്പിരിറ്റും ഭാഗ്യ ദേവതയുമെല്ലാം കനിഹയുടെ മികച്ച പ്രകടനങ്ങൾ നമ്മുടെ മുന്നിലെത്തിച്ച ഏതാനും ചില ചിത്രങ്ങളാണ്. അതുപോലെ പഴശ്ശി രാജ, മാമാങ്കം എന്നീ മലയാളത്തിലെ രണ്ടു ചരിത്ര സിനിമകളിൽ അഭിനയിക്കാൻ ഭാഗ്യം ലഭിച്ച നടി കൂടിയാണ് കനിഹ. തമിഴ് സിനിമകളിലും തിളങ്ങിയിട്ടുള്ള ഈ നടി ഒരു ഡബ്ബിങ് ആർട്ടിസ്റ്റ് ആയിട്ടും തമിഴിലെ ചില വമ്പൻ ചിത്രങ്ങളുടെ ഭാഗമായിട്ടുണ്ട്. സൂപ്പർ സ്റ്റാർ രജനികാന്തിന്റെ ശിവാജി, ദളപതി വിജയ് നായകനായ സച്ചിൻ, ചിയാൻ വിക്രം- ഷങ്കർ കൂട്ടുകെട്ടിലൊരുങ്ങിയ അന്യൻ എന്നീ ചിത്രങ്ങൾക്ക് വേണ്ടി തമിഴിൽ ഡബ്ബ് ചെയ്തിട്ടുണ്ട് കനിഹ. ഈ ചിത്രങ്ങളിലെ നായികമാരുടെ ശബ്ദമായി നമ്മൾ കേട്ടത് കനിഹയുടെ ശബ്ദമാണ്. ഈ ചിത്രങ്ങളിലെ നായികമാരായ ശ്രേയ സരൺ, ജെനീലിയ, സദ എന്നിവർക്ക് വേണ്ടിയാണു കനിഹ ശബ്ദം നൽകിയത്.

കനിഹ തന്നെയാണ് ഈ നടിമാരുടെ ചിത്രങ്ങൾ സഹിതം ഈ വിവരം തന്റെ സോഷ്യൽ മീഡിയ അക്കൗണ്ടിലൂടെ പ്രേക്ഷകരുമായി പങ്കു വെച്ചത്. അഭിനേത്രി, ഡബ്ബിങ് ആര്ടിസ്റ് എന്നത് കൂടാതെ നല്ലൊരു ഗായിക കൂടിയാണ് കനിഹ. മാത്രമല്ല ഒരു ഷോർട് ഫിലിം അടുത്തിടെ സംവിധാനം ചെയ്യുകയും ചെയ്തു ഈ നായികാ താരം. കനിഹയുടെ ഇനി വരാൻ പോകുന്ന ചിത്രം വിജയ് സേതുപതിക്കൊപ്പം അഭിനയിച്ച ഒരു തമിഴ് സിനിമയാണ്. യാദും ഊരേ യാവരും കേളിർ എന്നാണ് ഈ ചിത്രത്തിന്റെ പേര്. മലയാളം, തമിഴ് കൂടാതെ കന്നഡ, തെലുങ്കു സിനിമകളിലും കനിഹ അഭിനയിച്ചിട്ടുണ്ട്.