ലിയോയെ വീഴ്ത്താൻ കങ്കുവയും പുഷ്പയും; കേരളത്തിൽ ഷോ രാവിലെ 4 മണി മുതൽ

തമിഴ് സൂപ്പർതാരം സൂര്യ നായകനായ കങ്കുവ, തെലുങ്ക് സൂപ്പർതാരം അല്ലു അർജുൻ നായകനായ പുഷ്പ 2 എന്നിവയുടെ കേരളത്തിലെ തീയേറ്റർ ചാർട്ടിങ് ദ്രുതഗതിയിൽ നടക്കുകയാണ്. നവംബർ പതിനാലിന് ശ്രീ ഗോകുലം മൂവീസാണ് കങ്കുവ കേരളത്തിൽ എത്തിക്കുന്നതെങ്കിൽ, ഇ ഫോർ എന്റെർറ്റൈന്മെന്റ്സ് ആണ് പുഷ്പ 2 കേരളത്തിൽ വിതരണം ചെയ്യുക. ഡിസംബർ അഞ്ചിനാണ് പുഷ്പ 2 റിലീസ്.

ഇപ്പോൾ ലഭിക്കുന്ന വിവരങ്ങൾ പ്രകാരം, ഈ രണ്ട് ചിത്രങ്ങളും ലക്‌ഷ്യം വെക്കുന്നത് വിജയ് ചിത്രം ലിയോ കേരളത്തിൽ സ്ഥാപിച്ച 12 കോടിയുടെ ആദ്യ ദിന കളക്ഷൻ ആണ്. അതിനായി വെളുപ്പിനെ 4 മണി മുതൽ ഈ ചിത്രങ്ങളുടെ ഷോ കേരളത്തിൽ ആരംഭിക്കുമെന്നാണ് വാർത്ത. ഒട്ടേറെ ഫാൻസ്‌ ഷോകൾ ഇതിനായി സൂര്യ ആരാധകരും അല്ലു അർജുൻ ആരാധകരും കേരളത്തിൽ ഒരുക്കുകയാണ്.

പുഷ്പ 2 നു വെളുപ്പിനെ മുതൽ മാരത്തോൺ ഷോകൾ കളിക്കുന്നതിനായി ഇ ഫോർ എന്റർടൈൻമെന്റ് ടീമിനൊപ്പം മോഹൻലാൽ- ആന്റണി പെരുമ്പാവൂർ ടീമിന്റെ ആശീർവാദ് സിനിമാസ്, ലിസ്റ്റിൻ സ്റ്റീഫന്റെ മാജിക് ഫ്രെയിംസ് എന്നിവരും സഹകരിക്കുന്നുണ്ട്. ആശീർവാദ് സിനിമാസ്, മാജിക് ഫ്രെയിംസ് എന്നിവരുടെ കീഴിലുള്ള കേരളത്തിലെ എല്ലാ സ്‌ക്രീനുകളിലും പുഷ്പ 2 ന്റെ മാരത്തോൺ ഷോകൾ ഡിസംബർ അഞ്ചിന് വെളുപ്പിന് നാല് മണി മുതൽ ആരംഭിക്കും.

ശിവ ഒരുക്കിയ കങ്കുവ സൂര്യയുടെ കരിയറിലെ ഏറ്റവും വലിയ ചിത്രമാണ്. 350 കോടി ബഡ്ജറ്റിൽ ഒരുക്കിയ ചിത്രം കേരളത്തിൽ 500 ൽ കൂടുതൽ സ്‌ക്രീനുകളിലാണ് റിലീസ് ചെയ്യുക. സുകുമാർ ഒരുക്കിയ പുഷ്പ 2 ൽ മലയാളത്തിന്റെ ഫഹദ് ഫാസിലാണ് വില്ലൻ വേഷം ചെയ്യുന്നത് എന്നത് കൊണ്ട് തന്നെ മലയാളി പ്രേക്ഷകരെ ഏറെ ആകർഷിക്കുന്ന ഒരു രണ്ടാം ഭാഗമായി അതും മാറുമെന്നുറപ്പ്.