ഉലകനായകന്റെ ഇന്ത്യൻ 2 ആരംഭിക്കുന്നു; കൂടുതൽ വിവരങ്ങളിതാ

ഉലകനായകൻ കമൽ ഹാസനെ നായകനാക്കി തമിഴിലെ വമ്പൻ സംവിധായകൻ ഷങ്കർ ചെയ്യുന്ന ഇന്ത്യൻ 2 എന്ന ചിത്രത്തിന്റെ ഷൂട്ടിംഗ് ആരംഭിക്കുകയാണ്. സെപ്റ്റംബറിൽ ആരംഭിക്കാൻ പോകുന്ന ഈ ചിത്രത്തിന്റെ പുതിയ പോസ്റ്റർ ഇപ്പോൾ പുറത്തു വിട്ടു കഴിഞ്ഞു. ലൈക്ക പ്രൊഡക്ഷന്‍സിനൊപ്പം റെഡ് ജയ്ൻറ്റ് മൂവീസ് കൂടി ചേർന്നാണ് ഇനിയീ ചിത്രം നിർമ്മിക്കാൻ പോകുന്നത്. നേരത്തെ, കോവിഡ് പ്രതിസന്ധി മൂലമുണ്ടായ ചില പ്രശ്നങ്ങളും, ചിത്രത്തിന്റെ ഷൂട്ടിംഗ് സെറ്റില്‍ ക്രയിന്‍ താഴെ വീണ് അണിയറ പ്രവര്‍ത്തകര്‍ കൊല്ലപ്പെട്ടതും, നിര്‍മാണ കമ്പനിയായ ലൈക്ക പ്രൊഡക്ഷന്‍സ് നേരിട്ട സാമ്പത്തിക പ്രതിസന്ധിയുമൊക്കെയായി ഇന്ത്യൻ 2 ന്റെ നിർമ്മാണം നിന്ന് പോയിരുന്നു. ഏതായാലും ഇപ്പോൾ വീണ്ടും ആരംഭിക്കാൻ പോകുന്ന ഈ ചിത്രത്തിൽ വമ്പൻ താരനിരയാണ് കമൽ ഹാസനൊപ്പം അണിനിരക്കാൻ പോകുന്നത്.

നായികയായി കാജൽ അഗർവാൾ എത്തുമ്പോൾ, മറ്റു പ്രധാന വേഷങ്ങൾ ചെയ്യാൻ പോകുന്നത് രാകുൽ പ്രീത് സിംഗ്, പ്രിയ ഭവാനി ശങ്കര്‍, സിദ്ധാര്‍ഥ്, കാർത്തിക്, ഗുരു സോമസുന്ദരം, ബോബി- സിംഹ, മനോബല, ഗുൽഷൻ ഗ്രോവർ, അഖിലേന്ദ്ര മിശ്ര, കല്യാണി എന്നിവരാണ്. അനിരുദ്ധ് രവിചന്ദർ സംഗീതമൊരുക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് രവി വർമ്മൻ ആയിരിക്കും. ശ്രീകർ പ്രസാദാണ് ഇതിന്റെ എഡിറ്റർ. 1996 ഇൽ കമൽ ഹാസൻ- ഷങ്കർ ടീമിൽ നിന്ന് വന്ന ഇന്ത്യൻ എന്ന ട്രെൻഡ് സെറ്റർ ചിത്രത്തിന്റെ രണ്ടാം ഭാഗമാണ് ഈ പുതിയ ചിത്രം. ലോകേഷ് കനകരാജ് ഒരുക്കിയ വിക്രം എന്ന ഇൻഡസ്ട്രി ഹിറ്റ് ചിത്രത്തിന് ശേഷം കമൽ ഹാസൻ നായകനായി അഭിനയിക്കുന്ന ചിത്രമാണ് ഇന്ത്യൻ 2. ഇത് കൂടാതെ മഹേഷ് നാരായണൻ, എച് വിനോത് ചിത്രങ്ങളും അദ്ദേഹം ചെയ്യുമെന്ന് വാർത്തകളുണ്ട്.