വിജയ് സേതുപതിയോടുള്ള ആ ഇഷ്ടത്തിനുള്ള കാരണം തുറന്നു പറഞ്ഞു കമൽ ഹാസൻ

തമിഴ് സിനിമയുടെ ഉലക നായകനായ കമൽ ഹാസനും മക്കൾ സെൽവൻ വിജയ് സേതുപതിയും തമ്മിൽ കഴിഞ്ഞ ദിവസം നടന്ന ഇൻസ്റ്റാഗ്രാം ലൈവ് സംഭാഷണമാണ് ഇപ്പോൾ സോഷ്യൽ മീഡിയയിൽ വൈറലാവുന്നതു. ഏകദേശം ഒരു മണിക്കൂറോളം ഇൻസ്റ്റാഗ്രാം ലൈവിൽ വന്നു പരസ്പരം സംസാരിച്ച ഇരുവരും സിനിമയെ കുറിച്ചും ജീവിതത്തെ കുറിച്ചുമെല്ലാം ഒട്ടേറെ കാര്യങ്ങൾ പങ്കു വെച്ചു. ഇരുവരേയും കുറിച്ച് പ്രേക്ഷകർ അറിയാനാഗ്രഹിച്ച ഒട്ടേറെ കാര്യങ്ങളും ആ വീഡിയോയിൽ നിന്നറിയാൻ സാധിച്ചു എന്ന് പറയാം . അങ്ങനെ സംസാരിക്കുന്നതിനിടെയാണ് വിജയ് സേതുപതി എന്ന നടനെ താൻ ഒരുപാട് ഇഷ്ട്ടപെടുന്നതിന്റെ കാരണം കമൽ ഹാസൻ തുറന്നു പറഞ്ഞത്. അദ്ദേഹം പറയുന്നത് വിജയ് സേതുപതി എന്ന നടൻ ഒരിക്കലൂം സിനിമയുടെ കച്ചവടത്തിനും അതിന്റെ കൊമേർഷ്യൽ മാർക്കറ്റിനും പിന്നാലെ പായുന്നില്ല. അതിനു പകരം അദ്ദേഹം ചെയ്യുന്നത് വളരെ വ്യത്യസ്തമായ തിരക്കഥകൾ തിരഞ്ഞെടുക്കാനും കൗതുകമുണർത്തുന്ന കഥാപാത്രങ്ങളും ചിത്രങ്ങളും പ്രേക്ഷകരുടെ മുന്നിലെത്തിക്കാനുമാണ്. ഈ ഒരു മനോഭാവമാണ് വിജയ് സേതുപതി എന്ന നടനെ തന്റെ പ്രീയപെട്ടവനാക്കുന്നതെന്നു കമൽ ഹാസൻ പറയുന്നു.

കമൽ ഹാസൻ എന്ന മഹാനടൻ എക്കാലവും ചെയ്തു കൊണ്ടിരുന്ന കാര്യങ്ങൾ തന്നെയാണ് ഇപ്പോൾ വിജയ് സേതുപതിയും ചെയ്യുന്നതെന്ന് നമ്മുക്ക് പറയാൻ സാധിക്കും. കമൽ ഹാസനും പലപ്പോഴും താര പദവിക്കും സിനിമയുടെ കച്ചവട സാധ്യതകൾക്കും പുറകെ പോവാതെ സിനിമയിൽ തനിക്കു കൊണ്ട് വരാൻ കഴിയുന്ന കൗതുകത്തിനു വ്യത്യസ്തതക്കും പിന്നാലെയാണ് സഞ്ചരിച്ചത്. ഇന്ത്യൻ സിനിമയിൽ തന്നെ ഇത്രയധികം പരീക്ഷണങ്ങൾ ചെയ്ത മറ്റൊരു നടൻ ഉണ്ടാവില്ല എന്ന് തന്നെ പറയാം. ആ പരീക്ഷണങ്ങൾ ചിലതു പരാജയപ്പെട്ടപ്പോഴും അദ്ദേഹം അതിൽ പതറാതെ മുന്നോട്ടു നീങ്ങുകയും പിന്നീട് വലിയ വിജയങ്ങൾ കൈവരിക്കുകയും ചെയ്തു. വിജയ് സേതുപതിയും ആ മനോഭാവം വെച്ചു പുലർത്തുന്നത് കൊണ്ടാണ് തനിക്കു അദ്ദേഹത്തോട് കൂടുതൽ ഇഷ്ടം തോന്നുന്നത് എന്നാണ് കമൽ ഹസൻ കഴിഞ്ഞ ദിവസത്തെ സംഭാഷണത്തിൽ സൂചിപ്പിക്കുന്നത്.