ഇന്ത്യൻ 2 ഇൽ ഇരട്ട വേഷത്തിൽ കമൽ ഹാസൻ; കൂടുതൽ വിവരങ്ങൾ പുറത്ത് വിട്ട് രചയിതാവ്

ഉലകനായകൻ കമൽ ഹാസനെ നായകനാക്കി തമിഴിലെ സൂപ്പർ ഹിറ്റ് സംവിധായകൻ ഷങ്കർ ചെയ്യുന്ന ഇന്ത്യൻ 2 എന്ന ചിത്രത്തിന്റെ ഷൂട്ടിംഗ് ഇപ്പോൾ പുരോഗമിക്കുകയാണ്. ലൈക്ക പ്രൊഡക്ഷന്‍സിനൊപ്പം റെഡ് ജയ്ൻറ്റ് മൂവീസ് കൂടി ചേർന്നാണ് ഈ ചിത്രം നിർമ്മിക്കുന്നത്. 2 വർഷം മുൻപ് ഇതിന്റെ ഷൂട്ടിങ് ആരംഭിച്ചെങ്കിലും, കോവിഡ് പ്രതിസന്ധി മൂലമുണ്ടായ ചില പ്രശ്നങ്ങളും, ചിത്രത്തിന്റെ ഷൂട്ടിംഗ് സെറ്റില്‍ ക്രയിന്‍ താഴെ വീണ് അണിയറ പ്രവര്‍ത്തകര്‍ കൊല്ലപ്പെട്ടതും അതോടൊപ്പം ആ സമയത്ത് തന്നെ നിര്‍മാണ കമ്പനിയായ ലൈക്ക പ്രൊഡക്ഷന്‍സ് നേരിട്ട സാമ്പത്തിക പ്രതിസന്ധിയുമൊക്കെയായി ഷൂട്ടിങ് നിന്ന് പോയിരിന്നു. ഏതായാലും ഈ വർഷം ചിത്രം വീണ്ടും ആരംഭിച്ചു. അടുത്ത മാർച്ച് വരെ ഇതിന്റെ ഷൂട്ടിംഗ് തുടരുമെന്നാണ് സൂചന. വമ്പൻ താരനിരയാണ് കമൽ ഹാസനൊപ്പം ഈ ചിത്രത്തിൽ അണിനിരക്കുക.

ഇപ്പോഴിതാ ഈ ചിത്രത്തിൽ കമൽ ഹാസൻ ഇരട്ട വേഷത്തിലാണ് എത്തുക എന്ന വിവരം പുറത്ത് വിട്ടിരിക്കുകയാണ് രചയിതാവായ ജയമോഹൻ. സേനാപതി എന്ന കഥാപാത്രവും സേനാപതിയുടെ അച്ഛൻ കഥാപാത്രവും ആയാണ് ഇതിൽ കമൽ ഹാസൻ എത്തുന്നത്. ഇതിന്റെ ആദ്യ ഭാഗത്തിൽ സേനാപതിയും സേനാപതിയുടെ മകനും ആയാണ് കമൽ ഹാസൻ വേഷമിട്ടത്. ഇപ്പോൾ സേനാപതി ആവാൻ തന്റെ ശരീരഭാരം കുറയ്ക്കുകയാണ് ഉലകനായകൻ. കാജൽ അഗർവാൾ നായികാ വേഷം ചെയ്യുന്ന ഈ ചിത്രത്തിൽ, രാകുൽ പ്രീത് സിംഗ്, പ്രിയ ഭവാനി ശങ്കര്‍, സിദ്ധാര്‍ഥ്, കാർത്തിക്, ഗുരു സോമസുന്ദരം, ബോബി- സിംഹ, മനോബാല, ഗുൽഷൻ ഗ്രോവർ, അഖിലേന്ദ്ര മിശ്ര, കല്യാണി എന്നിവരും വേഷമിടുന്നുണ്ട്. അനിരുദ്ധ് രവിചന്ദർ സംഗീതമൊരുക്കുന്ന ഈ ചിത്രത്തിന് കാമറ ചലിപ്പിക്കുന്നത് രവി വർമ്മൻ ആണ്. 1996 ഇൽ  കമൽ ഹാസൻ- ഷങ്കർ ടീമിൽ നിന്ന് വന്ന ഇന്ത്യൻ എന്ന ട്രെൻഡ് സെറ്റർ ചിത്രത്തിന്റെ രണ്ടാം ഭാഗമാണ് ഇന്ത്യൻ 2.