ആസിഫ് അലി ചിത്രം കക്ഷി അമ്മിണിപ്പിള്ളയുടെ ട്രൈലെർ നിവിൻ പോളി റിലീസ് ചെയ്യുന്നു..!

യുവ താരം ആസിഫ് അലി നായകൻ ആയി എത്തുന്ന പുതിയ ചിത്രമാണ് കക്ഷി അമ്മിണി പിള്ള. ഈ വരുന്ന ഈദിനു കേരളത്തിൽ റിലീസ് ചെയ്യാൻ പോകുന്ന ഈ ചിത്രത്തിന്റെ പോസ്റ്ററുകളും ഇതിലെ ഗാനങ്ങളും ഇപ്പോൾ തന്നെ സോഷ്യൽ മീഡിയയിൽ വൈറൽ ആണ്. ഇപ്പോഴിതാ ഈ ചിത്രത്തിന്റെ ഒഫീഷ്യൽ ട്രെയ്‌ലറും എത്തുകയാണ്. യുവ താരം നിവിൻ പോളിയുടെ ഒഫീഷ്യൽ ഫേസ്ബുക് പേജിലൂടെ ആണ് ഈ ചിത്രത്തിന്റെ ട്രൈലെർ റിലീസ് ചെയ്യുന്നത്. ഇന്ന് വൈകുന്നേരം ആറു മണിക്ക് കക്ഷി അമ്മിണിപ്പിള്ള ട്രൈലെർ പ്രേക്ഷകരുടെ മുന്നിൽ എത്തും. നവാഗതനായ ദിന്‍ജിത്ത് അയ്യത്താന്‍ സംവിധാനം ചെയ്ത ഈ ചിത്രം രചിച്ചിരിക്കുന്നത് സനിലേഷ് ശിവൻ ആണ്.

സാറ ഫിലിംസിന്റെ ബാനറില്‍ റിജു രാജൻ നിർമ്മിച്ചിരിക്കുന്ന ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. ആസിഫ് അലിയോടൊപ്പം അഹമ്മദ് സിദ്ദിഖി, ബേസിൽ ജോസഫ്, വിജയരാഘവൻ, നിർമൽ പാലാഴി, സുധീഷ്, ശ്രീകാന്ത് മുരളി, ലുക്മാൻ, ഹരീഷ് കണാരൻ, ബാബു സ്വാമി, മാമൂക്കോയ, ഉണ്ണിരാജ, സുധീർ പറവൂർ, ശിവദാസൻ, ഷിബില, സരസ ബാലുശേരി എന്നിവരും ഈ ചിത്രത്തിൽ അഭിനയിച്ചിരിക്കുന്നു. അരുൺ മുരളീധരൻ, സാമുവൽ എബി എന്നിവർ ചേർന്ന് ഗാനങ്ങൾക്ക് ഈണം പകർന്നിരിക്കുന്ന ഈ ചിത്രത്തിന്റെ പശ്ചാത്തല സംഗീതം ഒരുക്കിയത് ജേക്സ് ബിജോയ് ആണ്.സ്നേഹ ചന്ദ്രൻ ഏഴിക്കര രചിച്ചു ഈണമിട്ട ഒരു ഗാനവും ഈ ചിത്രത്തിൽ ഉണ്ട്. സൂരജ് ഇ എസ് എഡിറ്റ് ചെയ്തിരിക്കുന്ന ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് ബാഹുൽ രമേശ് ആണ്.