ബിഗിലിനും ആറ്റ്ലിക്കും ആശംസകളുമായി കൈദി ഡയറക്ടർ; ഗംഭീര പ്രതികരണം നേടി രണ്ടു ചിത്രവും..!

ഇന്ന് റിലീസ് ചെയ്ത രണ്ടു തമിഴ് ചിത്രങ്ങൾ ആണ് ദളപതി വിജയ് നായകനായ ആറ്റ്ലി ചിത്രം ബിഗിലും കാർത്തി നായകനായി എത്തിയ ലോകേഷ് കനകരാജ് ചിത്രം കൈദിയും. രണ്ടു ചിത്രങ്ങളും ഇപ്പോൾ അതിഗംഭീര പ്രേക്ഷക പ്രതികരണം നേടി തീയേറ്ററുകളിൽ മുന്നേറുകയാണ്. തന്റെ ചിത്രം കൈദിക്കു ഒപ്പം റിലീസ് ആയ ബിഗിലിനും അതിലെ നായകനായ വിജയ്, സംവിധായകൻ ആറ്റ്ലി എന്നിവർക്കും വിജയാശംസകൾ നേർന്ന് കൊണ്ട് ലോകേഷ് കനകരാജ് ഇട്ട സോഷ്യൽ മീഡിയ പോസ്റ്റ് ഇപ്പോൾ ഏറെ ശ്രദ്ധ നേടുകയാണ്. രണ്ടു ചിത്രങ്ങളും വമ്പൻ വിജയം നേടുമെന്ന പ്രതീക്ഷയും പങ്കു വെക്കുന്ന ആ പോസ്റ്റ് രണ്ടു കൂട്ടരുടെയും ആരാധകർ ഏറ്റെടുത്തു കഴിഞ്ഞു.

ബിഗിലിനു ശേഷം ദളപതി വിജയ് നായകനാകുന്നത് ലോകേഷ് കനകരാജ് ഒരുക്കുന്ന ഗ്യാങ്സ്റ്റർ ത്രില്ലറിൽ ആണ്. ആ ചിത്രത്തിന്റെ ഷൂട്ടിംഗ് ആരംഭിച്ചു കഴിഞ്ഞു. കൈദി ഗംഭീര റിപ്പോർട് ഇപ്പോൾ നേടുമ്പോൾ വിജയ് ആരാധകരും അത് ആഘോഷമാക്കുകയാണ്. കാരണം ഇപ്പോൾ അവരുടെ ഹീറോ അഭിനയിച്ചു കൊണ്ടിരിക്കുന്നത് ലോകേഷ് കനകരാജ് ചിത്രമായതു കൊണ്ട് തന്നെ കൈദിയെക്കാളും ഗംഭീര ചിത്രമാണ് അവർ വിജയ്- ലോകേഷ് കനകരാജ് കൂട്ടുകെട്ടിൽ നിന്ന് പ്രതീക്ഷിക്കുന്നത്. വിജയ് സേതുപതി, ആന്റണി വർഗീസ്, മാളവിക മോഹൻ എന്നിവരും അഭിനയിക്കുന്ന വിജയ്- ലോകേഷ് കനകരാജ് ചിത്രത്തിന്റെ ദൃശ്യങ്ങൾ ഒരുക്കുന്ന സത്യൻ സൂര്യനും എഡിറ്റിംഗ് നിർവഹിക്കുന്ന ഫിലോമിൻ രാജ്ഉം കൈദിയിലും ജോലി ചെയ്തവർ ആണ്. ഏതായാലും ഈ ദീപാവലി തമിഴ് സിനിമകളുടെ ആരാധകർക്ക് ഗംഭീര ദൃശ്യ വിരുന്നു തന്നെയാണ് സമ്മാനിച്ചിരിക്കുന്നതു.