കബാലി നായികയുടെയും ഇഷ്ടതാരം മോഹൻലാൽ; സായി ധൻസിക മനസ്സ് തുറക്കുന്നു..!

മലയാളത്തിന്റെ മഹാനടൻ മോഹൻലാൽ ഇന്ത്യൻ സിനിമയിൽ തന്നെ ഏറ്റവും കൂടുതൽ സെലിബ്രിറ്റി ആരാധകർ ഉള്ള നടൻ ആണ്. ഒരുപക്ഷെ മോഹൻലാലിനോളം ആരാധകർ സിനിമാ ഇന്ടസ്ട്രിയിലുള്ള നടൻമാർ വളരെ കുറവായിരിക്കും ഇന്ത്യൻ സിനിമയിൽ. സാങ്കേതിക പ്രവർത്തകരും, സംവിധായകരും നടീനടന്മാരും തുടങ്ങി സിനിമയുടെ വിവിധ മേഖലയിൽ പ്രവർത്തിക്കുന്ന അനേകം പേർ, അതും ഇന്ത്യൻ സിനിമയിലെ ഒട്ടു മിക്ക ഇന്ടസ്ട്രികളിലും ഉള്ളവർ മോഹൻലാലിനോടുള്ള തങ്ങളുടെ ആരാധന പല അവസരങ്ങളിൽ തുറന്നു പറഞ്ഞിട്ടുണ്ട്. മലയാള സിനിമയെ പറ്റി ചോദിക്കുമ്പോൾ തന്നെ ഏവരും ആദ്യം പറയുന്ന പേരാണ് മോഹൻലാലിന്റേതു. സാക്ഷാൽ എസ് എസ് രാജമൗലി മുതൽ അമിതാബ് ബച്ചനും ആമിർ ഖാനും വരെ കടുത്ത മോഹൻലാൽ ആരാധകർ ആണ്. ഇപ്പോഴിതാ പ്രശസ്ത തമിഴ് നടി സായി ധൻസികയും തനിക്കു മോഹൻലാലിനോടുള്ള ആരാധന തുറന്നു പറഞ്ഞു മുന്നോട്ടു വന്നിരിക്കുകയാണ്.

മാതൃഭൂമി ക്ലബ് എഫ് എമ്മിന് നൽകിയ അഭിമുഖത്തിൽ ആണ് സായി ധൻസിക ഈ കാര്യം തുറന്നു പറഞ്ഞത്. മലയാള സിനിമയിൽ തനിക്കു ഏറ്റവും ഇഷ്ടമുള്ള നടൻ മോഹൻലാൽ ആണെന്നാണ് സായി ധൻസിക പറയുന്നത്. പാർവതി ഇഷ്ടമുള്ള നടിയാണെന്നും ധൻസിക പറഞ്ഞു. കബാലി എന്ന രജനികാന്ത് ചിത്രത്തിലൂടെയാണ് ധൻസിക പ്രശസ്തയാവുന്നതു. കബാലി ഗേൾ എന്ന് ഇപ്പോൾ അറിയപ്പെടുന്ന ധൻസിക രജനികാന്തിന്റെ മകൾ ആയാണ് കബലിയിൽ അഭിനയിച്ചത്. ആ ചിത്രത്തിലെ ധൻസികയുടെ കിടിലൻ ആക്ഷൻ രംഗങ്ങളും ഈ നടിക്ക് ഒരുപാട് ആരാധകരെ നേടിക്കൊടുത്തു. ദുൽകർ സൽമാന്റെ നായികയായി സോളോ എന്ന ചിത്രത്തിലൂടെ ധൻസിക മലയാളത്തിലും അഭിനയിച്ചിട്ടുണ്ട്. ബിജോയ് നമ്പ്യാർ ഒരുക്കിയ ഈ ദ്വിഭാഷാ ചിത്രത്തിലും മികച്ച പ്രകടനമാണ് ധൻസിക കാഴ്ച വെച്ചത്. മാതൃഭൂമി ലൈവ് വിത്ത് ലജന്റ്‌സ് ഷോയില്‍ പ്രഭുദേവയ്‌ക്കൊപ്പം ധന്‍സിക നൃത്തം ചെയ്യുന്നുണ്ട്. ഏപ്രില്‍ 20 ന് ഷാര്‍ജ ക്രിക്കറ്റ് സ്റ്റേഡിയത്തില്‍ വച്ചാണ് ഈ ഷോ നടക്കുന്നത്.