ജോസഫ് തിയേറ്റർ ലിസ്റ്റ് എത്തി; എം പദ്മകുമാർ- ജോജു ജോർജ് ടീമിന്റെ ത്രില്ലർ ഇന്ന് മുതൽ..!

പ്രശസ്ത നടനും നിർമ്മാതാവുമായ ജോജു ജോർജ് നായകനായി എത്തുന്ന പുതിയ ചിത്രമാണ് ജോസഫ്. എണ്ണം പറഞ്ഞ ചിത്രങ്ങൾ മലയാളികൾക്ക് സമ്മാനിച്ചിട്ടുള്ള എം പദ്മകുമാർ ആണ് ഈ ഫാമിലി ത്രില്ലെർ ചിത്രം ഒരുക്കിയിരിക്കുന്നത്. അപ്പു പാത്തു പപ്പു പ്രൊഡക്ഷൻ ഹൗസിന്റെ ബാനറിൽ ജോജു ജോർജ് തന്നെ നിർമ്മിച്ചിരിക്കുന്ന ഈ ചിത്രം ഇന്ന് മുതൽ കേരളത്തിൽ പ്രദർശനം ആരംഭിക്കുകയാണ്. ഷാഹി കബീർ തിരക്കഥ രചിച്ചിരിക്കുന്ന ഈ ചിത്രത്തിൽ ഒരു റിട്ടയേർഡ് പോലീസ് ഓഫീസർ ആയാണ് ജോജു ജോർജ് അഭിനയിച്ചിരിക്കുന്നത്. ഈ ചിത്രത്തിന്റെ തിയേറ്റർ ലിസ്റ്റ് ഇവിടെ ചേർക്കുന്നു. കേരളത്തിൽ മികച്ച റിലീസ് ആണ് ജോസെഫ് നേടിയിരിക്കുന്നത് എന്ന് പറയാം.

രഞ്ജിൻ രാജ് സംഗീതം ഒരുക്കിയ ഈ ചിത്രം എഡിറ്റ് ചെയ്തത് കിരൺ ദാസും ദൃശ്യങ്ങൾ ഒരുക്കിയത് മനേഷ് മാധവനും ആണ്. കട്ട കലിപ്പ് ലുക്കിലാണ് ജോജു ജോർജ് ഈ ചിത്രത്തിൽ പ്രത്യക്ഷപ്പെട്ടിരിക്കുന്നത്. നിർമ്മാതാവ്, അഭിനേതാവ് എന്നത് കൂടാതെ ഈ ചിത്രത്തിൽ ഒരു ഗായകനായും കൂടി ജോജു ജോർജ് അരങ്ങു തകർത്തിട്ടുണ്ട്. ഈ ചിത്രത്തിലേതായി ഇതുവരെ റിലീസ് ചെയ്ത എല്ലാ ഗാനങ്ങളും സൂപ്പർ ഹിറ്റാണ്. ഇതിന്റെ കിടിലൻ പോസ്റ്ററുകളും ടീസറുമെല്ലാം പ്രേക്ഷകരെ ഏറെ ആകർഷിച്ചിട്ടുണ്ട്. അതുകൊണ്ട് തന്നെ ഏറെ പ്രതീക്ഷയോടെ പ്രേക്ഷകർ കാത്തിരിക്കുന്ന ചിത്രമാണ് ജോസെഫ് . ദിലീഷ് പോത്തൻ, സുധി കോപ്പ, ഇർഷാദ് തുടങ്ങിയവരും ഈ ചിത്രത്തിൽ നിർണായക കഥാപാത്രങ്ങളെ അവതരിപ്പിക്കുന്നുണ്ട്. പ്രശസ്ത സംഗീത സംവിധായകൻ അനിൽ ജോൺസൺ ആണ് ജോസഫിന് വേണ്ടി പശ്ചാത്തല സംഗീതം ഒരുക്കിയിരിക്കുന്നത്.