വളരെ സിമ്പിൾ ആയ ഒരു തമാശ കൊണ്ട് വന്നു പവർഫുൾ ആക്കിയ വിനയ് ഫോർട്ട്; തമാശക്ക് പ്രശംസയുമായി ജോജു ജോർജ്..!

പ്രശസ്ത നടൻ വിനയ് ഫോർട്ട് നായകനായി എത്തിയ തമാശ എന്ന ചിത്രം ഗംഭീര പ്രേക്ഷക- നിരൂപക പ്രശംസ നേടി മുന്നേറുകയാണ്. മലയാള സിനിമയിലെ പ്രമുഖ താരങ്ങൾ അടക്കം എല്ലാവരും ഈ ചിത്രത്തേയും ഇതിലെ വിനയ് ഫോർട്ടിന്റെ പ്രകടനത്തേയും പ്രശംസിച്ചു കൊണ്ട് മുന്നോട്ടു വന്നിരിക്കുകയാണ്. ഇപ്പോഴിതാ പ്രശസ്ത നടൻ ജോജു ജോർജ് ആണ് തമാശക്കും വിനയ് ഫോർട്ടിനും പ്രശംസയുമായി എത്തിയിരിക്കുന്നത്. വളരെ സിമ്പിൾ ആയ ഒരു തമാശയെ വളരെ പവർഫുൾ ആയാണ് വിനയ് ഫോർട്ട് അവതരിപ്പിച്ചിരിക്കുന്നത് എന്നും വിനയ് ഫോർട്ട് നമ്മുടെ ചങ്കാണ് എന്നും ജോജു ജോർജ് പറയുന്നു. ചിത്രത്തിലെ ഓരോ അഭിനേതാക്കളും മികച്ച പ്രകടനം ആണ് കാഴ്ച വെച്ചിരിക്കുന്നത് എന്നും എല്ലാവരും തമാശ തീയേറ്ററിൽ പോയി കാണണം എന്നും ജോജു ജോർജ് പറയുന്നു.

ജോജു ജോർജിന്റെ വീഡിയോ ഫേസ്ബുക്കിൽ പങ്കു വെച്ച് കൊണ്ട് വിനയ് ഫോർട്ട് നന്ദിയും പറഞ്ഞിട്ടുണ്ട്. തന്റെ സൂപ്പർ സ്റ്റാർ ആയ ജോജുവിന്‌ നന്ദി എന്നാണ് വിനയ് ഫോർട്ട് കുറിച്ചിരിക്കുന്നത്. നവാഗതനായ അഷറഫ് ഹംസ രചനയും സംവിധാനവും നിർവഹിച്ച തമാശ നിർമ്മിച്ചിരിക്കുന്നത് ഹാപ്പി ഹൗർസ് എന്റർടൈൻമെൻറ്സിന്റെ ബാനറിൽ സമീർ താഹിർ, ഷൈജു ഖാലിദ്, ലിജോ ജോസ് പെല്ലിശ്ശേരി, ചെമ്പൻ വിനോദ് എന്നിവർ ചേർന്നാണ്. വിനയ് ഫോർട്ട് അവതരിപ്പിക്കുന്ന ശ്രീനിവാസൻ എന്ന അധ്യാപക കഥാപാത്രത്തിന്റെ ജീവിതത്തിലൂടെയുള്ള രസകരമായ ഒരു സഞ്ചാരം ആണ് ഈ ചിത്രം. ദിവ്യ പ്രഭ, ഗ്രേസ് ആന്റണി, ചിന്നു സരോജിനി എന്നിവർ ആണ് ഈ ചിത്രത്തിലെ നായികാ വേഷങ്ങൾ ചെയ്തിരിക്കുന്നത്.