ഒന്നുമല്ലായിരുന്ന കാലത്തും അദ്ദേഹമെന്റെ കാര്യം ശ്രദ്ധിച്ചിരുന്നു: ജോജു ജോർജ്..!

ഇന്ന് മലയാള സിനിമയിലെ ഏറ്റവും പ്രശസ്തരായ താരങ്ങളിൽ ഒരാളാണ് ജോജു ജോർജ്. ഒരു താരമെന്ന നിലയിൽ മാത്രമല്ല ഒരു നടനെന്ന നിലയിലും ദേശീയ- സംസ്ഥാന അംഗീകാരങ്ങൾ തേടിയെത്തിയ ഈ പ്രതിഭ മികച്ച ചിത്രങ്ങൾ പ്രേക്ഷകർക്ക് മുന്നിലെത്തിക്കുന്ന ഒരു നിർമ്മാതാവ് കൂടിയാണ്. ജൂനിയർ ആർട്ടിസ്റ്റ് ആയി ഒട്ടേറെ വർഷങ്ങൾ മലയാള സിനിമയിൽ നിന്നതിനു ശേഷമാണു ജോജു ജോർജ് എന്ന നടന് ശ്രദ്ധിക്കപ്പെടുന്ന വേഷങ്ങൾ ലഭിച്ചതും, ഈ നടന്റെ കഴിവുകൾ മലയാള സിനിമാ പ്രേക്ഷകർക്ക് മുന്നിലെത്തുന്നതും. ഇപ്പോൾ കൈ നിറയെ ചിത്രങ്ങളുള്ള ഈ നടൻ വ്യത്യസ്ത കഥാപാത്രങ്ങൾ തേടിയുള്ള യാത്രയിലാണ്. ഇപ്പോഴിതാ തന്റെ സിനിമാ യാത്രയെ കുറിച്ച് സംസാരിക്കുമ്പോൾ ജോജു എടുത്തു പറയുന്നത് മലയാളത്തിന്റെ മെഗാ സ്റ്റാർ മമ്മൂട്ടിയുമായുള്ള ബന്ധത്തെ കുറിച്ചാണ്. ലാൽജോസ്, ബിജു മേനോൻ, അനൂപ് മേനോൻ, മമ്മൂക്ക, കുഞ്ചാക്കോ ബോബൻ തുടങ്ങി ഒരുപാട് പേർ തന്നെ സഹായിച്ചിട്ടുണ്ട് എന്നാണ് ജോജു പറയുന്നത്.

ബിജു മേനോനുമായുള്ള സൗഹൃദം തന്റെ കരിയറിൽ വഴിത്തിരിവായിരുന്നു എന്ന് പറഞ്ഞ ജോജു താൻ ആരാധിക്കുകയും സ്‌നേഹിക്കുകയും ചെയ്യുന്നയാളാണ് മമ്മൂക്ക എന്നും താൻ ഒന്നുമല്ലാതിരുന്ന സമയത്തും അദ്ദേഹം തന്റെ കാര്യങ്ങൾ ശ്രദ്ധിച്ചിരുന്നു എന്നും വെളിപ്പെടുത്തുന്നു. ഇപ്പോൾ തന്റെ കരിയർ എത്തി നിൽക്കുന്ന അവസ്ഥയിൽ താൻ ഏറെ തൃപ്തനാണ് എന്നും ജോജു പറയുന്നു. ലാൽ ജോസ് സംവിധാനം ചെയ്ത കുഞ്ചാക്കോ ബോബൻ ചിത്രമായ പുള്ളിപ്പുലികളും ആട്ടിൻകുട്ടിയും ആണ് ജോജു ജോർജിന്റെ കരിയറിലെ വഴിത്തിരിവായ ചിത്രങ്ങളിൽ ഒന്ന്. പിന്നീട് ആക്ഷൻ ഹീറോ ബിജു, ഒരു സെക്കന്റ് ക്ലാസ് യാത്ര, ലുക്കാ ചുപ്പി, രാമന്റെ ഏദൻ തോട്ടം, ജോസഫ് , പൊറിഞ്ചു മറിയം ജോസ്, ചോല തുടങ്ങിയ ഒട്ടേറെ ചിത്രങ്ങളിലൂടെ ജോജു ജോർജ് തന്റെ കഴിവ് തെളിയിച്ചു.