ഒരുങ്ങുന്നത് ജീത്തു ജോസഫിന്റെ കരിയറിലെ ഏറ്റവും വലിയ ചിത്രം..

ഇപ്പോൾ ലഭിക്കുന്ന റിപ്പോർട്ടുകൾ ശരിയാണെങ്കിൽ തന്റെ കരിയറിലെ ഏറ്റവും വലിയ മലയാള ചിത്രം ഒരുക്കാനുള്ള തയ്യാറെടുപ്പിലാണ് സൂപ്പർ ഹിറ്റ് സംവിധായകൻ ആയ ജീത്തു ജോസെഫ്. ദൃശ്യം എന്ന മോഹൻലാൽ ചിത്രത്തിലൂടെ മലയാള സിനിമയ്ക്കു അമ്പതു കോടിയുടെ ബോക്സ് ഓഫീസ് തിളക്കം ആദ്യമായി സമ്മാനിച്ച സംവിധായകൻ ആണ് ജീത്തു ജോസെഫ്. ഇപ്പോൾ തന്റെ കരിയറിലെ ഏറ്റവും വലിയ ചിത്രം ഒരുക്കാൻ ഒരുങ്ങുമ്പോഴും ജീത്തുവിന്റെ ചോയ്സ് മോഹൻലാൽ ആണെന്നാണ് റിപ്പോർട്ടുകൾ നമ്മളോട് പറയുന്നത്. ഈ വർഷം നവംബർ മാസത്തിൽ മോഹൻലാൽ- ജീത്തു ചിത്രം ആരംഭിക്കും എന്നാണ് സൂചന. പ്രശസ്ത തമിഴ് നടി ആയ തൃഷ ആയിരിക്കും ഈ ചിത്രത്തിലെ നായികാ വേഷം ചെയ്യുക എന്നും റിപ്പോർട്ടുകൾ വരുന്നുണ്ട്.

ഹേ ജൂഡ് എന്ന നിവിൻ പോളി ചിത്രത്തിലൂടെ മലയാളത്തിൽ എത്തിയ തൃഷയുടെ രണ്ടാമത്തെ മലയാള ചിത്രമായിരിക്കും ഇത്. ഒരു തമിഴ് നിർമ്മാണ കമ്പനി നിർമ്മിക്കാൻ പോകുന്ന ഈ ചിത്രത്തിന്റെ തിരക്കഥയും ജീത്തു ജോസെഫ് തന്നെയാണ് എഴുതുന്നത്. ഒരു ഫാമിലി ത്രില്ലർ ആയി ഒരുക്കാൻ പോകുന്ന ഈ ചിത്രത്തിന് നൂറു ദിവസത്തോളം ഷൂട്ടിംഗ് ഉണ്ടാകും എന്നും അതിൽ പകുതി ദിവസത്തോളം വിദേശ ലൊക്കേഷനുകളിൽ ആയിരിക്കും എന്നും ആണ് വിവരങ്ങൾ ലഭിക്കുന്നത്. യു കെ , ഈജിപ്റ്റ് എന്നിവിടങ്ങൾ ആണ് വിദേശത്തെ പ്രധാന ലൊക്കേഷനുകൾ. കേരളത്തിൽ കൊച്ചിയിൽ ആണ് ഈ ചിത്രം ഷൂട്ട് ചെയ്യുക. ഇപ്പോൾ തമിഴിൽ ഒരുക്കിയ കാർത്തി- ജ്യോതിക ചിത്രത്തിന്റെ പോസ്റ്റ്-പ്രൊഡക്ഷൻ തിരക്കിലാണ് ജിത്തു ജോസെഫ്. ഒരു ഹിന്ദി ചിത്രവും ജിത്തു ജോസെഫിന്റെതായി റിലീസ് ചെയ്യാൻ ഉണ്ട്.