മൂന്നര മിനിട്ടു നീളമുള്ള സീൻ, എട്ടു പേജിനു മുകളിൽ ഡയലോഗ്; ദൃശ്യം 2 ഇൽ ആ അത്ഭുതം വീണ്ടും കണ്ടു..!

കംപ്ലീറ്റ് ആക്ടർ മോഹൻലാലിനെ നായകനാക്കി ദൃശ്യം 2 എന്ന ചിത്രം പൂർത്തിയാക്കിയ സംവിധായകൻ ജീത്തു ജോസഫ് ഇപ്പോൾ അതിന്റെ പോസ്റ്റ് – പ്രൊഡക്ഷൻ ജോലികളിൽ ആണ്. ഈ മാസമാദ്യം ഷൂട്ടിംഗ് പൂർത്തിയാക്കിയ ദൃശ്യം 2 സാഹചര്യങ്ങൾ അനുകൂലമായാൽ, ആദ്യത്ത വർഷം ഏപ്രിൽ മാസത്തിൽ ആശീർവാദ് സിനിമാസ് തീയേറ്ററിൽ എത്തിക്കുമെന്നാണ് പ്രതീക്ഷിക്കപ്പെടുന്നത്. ഇപ്പോഴിതാ കഴിഞ്ഞ ദിവസം റിപ്പോർട്ടർ ചാനലിലെ മീറ്റ് ദി എഡിറ്റേഴ്സ് എന്ന പ്രോഗ്രാമിൽ പങ്കെടുത്ത ജീത്തു ജോസഫ്, ദൃശ്യം 2 എന്ന ചിത്രത്തിലെ മോഹൻലാൽ എന്ന നടന്റെ അഭിനയ മികവിനെ കുറിച്ച് വാചാലനായതാണ് സോഷ്യൽ മീഡിയ വലിയ രീതിയിൽ ഏറ്റെടുക്കുന്നത്. മലയാളം, തമിഴ്, ഹിന്ദി ഭാഷകളിൽ ചിത്രമൊരുക്കിയിട്ടുള്ള ജീത്തു ജോസഫിനെ ഏറ്റവും കൂടുതൽ അത്ഭുതപ്പെടുത്തിയിട്ടുള്ള നടൻ ആരാണെന്ന ചോദ്യത്തിന് ജീത്തു സംശയമൊന്നുമില്ലാതെ പറയുന്നത് മോഹൻലാൽ എന്ന പേരാണ്. ഇന്ത്യൻ സിനിമയിലെ തന്നെ അത്ഭുതമാണ് മോഹൻലാൽ എന്നും കമൽ ഹാസനൊപ്പം താൻ ജോലി ചെയ്തിട്ടുണ്ടെങ്കിലും മോഹൻലാൽ അതിലും മുകളിൽ ആണെന്നും ജീത്തു ജോസഫ് പറയുന്നു.

മോഹൻലാൽ എന്ന നടന്റെ ആ അത്ഭുത പ്രകടനം താൻ ദൃശ്യം 2 ചിത്രീകരിക്കുമ്പോഴും കണ്ടെന്നും ജീത്തു ജോസഫ് പറയുന്നു. ദൃശ്യം 2 ഇൽ ഏകദേശം മൂന്നര മിനിറ്റോളം നീളം വരുന്ന ഒരു സീനിൽ എട്ടു പേജോളം വരുന്ന ഡയലോഗ് ഉണ്ടായിരുന്നു എന്നും, രണ്ടു ക്യാമറ വെച്ചാണ് താനത് ചിത്രീകരിച്ചത് എന്നും ജീത്തു പറയുന്നു. ആ രംഗം മോഹൻലാൽ എന്ന നടൻ ചെയ്തത് ഒറ്റ ടേക്കിൽ ആണെന്നും പ്രകടനം കൊണ്ടും ഡയലോഗ് ഡെലിവറി കൊണ്ടുമെല്ലാം തന്നെ അദ്ദേഹം അത്ഭുതപ്പെടുത്തിയ ഒരു രംഗമാണ് അതെന്നും ജീത്തു വിശദീകരിക്കുന്നു. അതീവ രസകരമായാണ് മോഹൻലാലും ഈ സീനിലെ അദ്ദേഹത്തിന്റെ സഹതാരവും അഭിനയിച്ചത് എന്നും ജീത്തു പറയുന്നു.