ദുൽഖർ സൽമാനെ നായകനാക്കി ജീത്തു ജോസഫ് ചിത്രം; കൂടുതൽ വിവരങ്ങൾ പുറത്തു വിട്ടു സംവിധായകൻ..!

മലയാളത്തിലെ പ്രശസ്ത സംവിധായകനായ ജീത്തു ജോസഫ് ഇപ്പോൾ തമിഴിലും ബോളിവുഡിലും വരെ ചിത്രങ്ങളൊരുക്കി കയ്യടി നേടിയ പ്രതിഭയാണ്. മലയാളത്തിലെ ആദ്യത്തെ അമ്പതു കോടി കളക്ഷൻ നേടിയ ദൃശ്യം എന്ന ക്ലാസിക് ഒരുക്കിയ ജീത്തു ജോസഫ്, ഇപ്പോൾ മോഹൻലാലിനെ നായകനാക്കി അതിന്റെ രണ്ടാം ഭാഗം ഒരുക്കാനുള്ള പ്ലാനിലാണ്. ദൃശ്യം 2 എന്ന പേരിൽ പ്രഖ്യാപിക്കപ്പെട്ട ആ ചിത്രം ലോക്ക് ഡൌൺ കഴിഞ്ഞാൽ ഉടൻ തന്നെ ഷൂട്ടിംഗ് ആരംഭിച്ചു അറുപതു ദിവസം കൊണ്ട് തീർക്കാനാണ് ജീത്തു തീരുമാനിച്ചിരിക്കുന്നത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ആ ചിത്രം തീർത്തു കഴിഞ്ഞാൽ പിന്നീട് ജീത്തു ചെയ്യുന്നതും ഒരു മോഹൻലാൽ ചിത്രം തന്നെയാണ്. റാം എന്ന് പേരിട്ടിരിക്കുന്ന ആ ചിത്രത്തിന്റെ പകുതി ഷൂട്ടിംഗ് ഇപ്പോഴേ തീർന്നു കഴിഞ്ഞു. എന്നാൽ റാമിന്റെ ഇനിയുള്ള ഷെഡ്യൂളുകൾ വിദേശത്തു ആയതു കൊണ്ട് തന്നെ കോവിഡ് 19 പടരുന്ന പശ്ചാത്തലത്തിലാണ് അതിന്റെ ഷൂട്ടിംഗ് നീണ്ടു പോകുന്നത്. ഇപ്പോഴിതാ മലയാളത്തിലെ യുവ താരം ദുൽഖർ സൽമാനെ നായകനാക്കിയും ഒരു ചിത്രം ചെയ്യാനുള്ള പ്ലാനിലാണ് താനെന്നു വെളിപ്പെടുത്തുകയാണ് ജീത്തു ജോസഫ്.

ഒരു സോഷ്യൽ മീഡിയ ലൈവ് ചാറ്റിലാണ് അദ്ദേഹം ഈ വിവരം തുറന്നു പറയുന്നത്. ദുൽഖർ സൽമാനെ ഒരിക്കൽ കണ്ടു താനൊരു വിഷയം അവതരിപ്പിച്ചു എന്നും അദ്ദേഹം അതുമായി മുന്നോട്ടു പോവാം എന്ന് പറഞ്ഞിട്ടുണ്ട് എന്നും ജീത്തു പറഞ്ഞു. എന്നാൽ പിന്നീട് തിരക്ക് മൂലം തനിക്കു ആ ചിത്രത്തിന്റെ കഥയോ തിരക്കഥയോ മുന്നോട്ടു കൊണ്ട് പോകാൻ സാധ്‌ച്ചില്ല എന്നും, ദൃശ്യം 2, റാം എന്നീ ചിത്രങ്ങളുടെ തിരക്കിന് ശേഷം ആ കഥ പൂർത്തിയാക്കി ദുൽഖറിനെ പോയിക്കണ്ടു ആ പ്രൊജക്റ്റ് മുന്നോട്ടു കൊണ്ട് പോകുമെന്നും ജീത്തു ജോസഫ് പറയുന്നു. മോഹൻലാൽ, കമൽ ഹാസൻ, ഋഷി കപൂർ, ദിലീപ്. പൃഥ്വിരാജ്, പ്രണവ് മോഹൻലാൽ, സുരേഷ് ഗോപി, കാളിദാസ് ജയറാം, എന്നിവരെയെല്ലാം വെച്ച് ചിത്രമൊരുക്കിയിട്ടുള്ള സംവിധായകനാണ് ജീത്തു ജോസഫ്.