തന്റെ ജീവിതം വെള്ളിത്തിരയിൽ കണ്ട് ജയേഷ്; ഒരു കുപ്രസിദ്ധ പയ്യന് പ്രചോദനമായ ജീവിത കഥയിലെ നായകൻ ഇവിടെയുണ്ട്..!

ഒരു കുപ്രസിദ്ധ പയ്യൻ എന്ന മധുപാൽ ചിത്രം ഇപ്പോൾ തീയേറ്ററുകളിൽ നിറഞ്ഞ സദസ്സിൽ പ്രദർശിപ്പിക്കുകയാണ്. ടോവിനോ തോമസ് നായകനായ ഈ ചിത്രം ഒരു മർഡർ മിസ്റ്ററി ത്രില്ലെർ ആയാണ് ഒരുക്കിയിരിക്കുന്നത്. വി സിനിമാസ് നിർമ്മിച്ച് ജീവൻ ജോബ് തിരക്കഥ രചിച്ച ഈ ചിത്രത്തിൽ അജയൻ എന്ന കഥാപാത്രം ആയാണ് ടോവിനോ അഭിനയിച്ചിരിക്കുന്നത്. ടോവിനോക്കു ഒപ്പം നിമിഷ സജയൻ, അനു സിതാര, നെടുമുടി വേണു, ജി സുരേഷ് കുമാർ , സിദ്ദിഖ്, സുജിത് ശങ്കർ, സുധീർ കരമന, ശരണ്യ പൊൻവണ്ണൻ എന്നിവരും ഈ ചിത്രത്തിന്റെ ഭാഗമാണ്. റിയൽ ലൈഫ് സംഭവങ്ങളിൽ നിന്ന് പ്രചോദനം ഉൾക്കൊണ്ടാണ് ഈ ചിത്രം നിർമ്മിക്കപ്പെട്ടിട്ടുള്ളത്.

കോഴിക്കോട് വെച്ച് വർഷങ്ങൾക്കു മുൻപ് നടന്ന സുന്ദരിയമ്മാൾ കൊലക്കേസ് ആണ് ഈ ചിത്രത്തിന് ആധാരമായതു. ടോവിനോ അവതരിപ്പിച്ച അജയൻ എന്ന കഥാപാത്രം രൂപപ്പെടുത്തിയിരിക്കുന്നത് ജയേഷ് എന്ന റിയൽ ലൈഫ് കഥാപാത്രത്തെ അടിസ്ഥാനമാക്കിയാണ്. ഈ ചിത്രത്തിൽ ടോവിനോയുടെ അജയൻ കടന്നു പോയ ഓരോ നിമിഷത്തിലൂടെയും അതിലും തീവ്രമായ വേദന സഹിച്ചു കടന്നു പോയ ആളാണ് ജയേഷ് . തന്നെ അടിസ്ഥാനമാക്കി ഒരു സിനിമ ഇറങ്ങിയത് ഒന്നും ജീവിക്കാൻ വേണ്ടി ഓരോ ദിവസവും പാട് പെടുന്ന ജയേഷ് അറിഞ്ഞിരുന്നില്ല. ഒടുവിൽ ഈ ചിത്രത്തെ കുറിച്ചറിഞ്ഞു ഇത് കണ്ട ജയേഷ് കണ്ണീരോടെയാണ് തിയേറ്റർ വിട്ടിറങ്ങിയത്. കോടതി വെറുതെ വിട്ടു എങ്കിലും ഇപ്പോഴും പോലീസ് ചാർത്തി കൊടുത്ത കള്ളൻ അല്ലെങ്കിൽ കൊലപാതകി എന്ന പേര് ജയേഷിന്റെ ജീവിതത്തെ നരക തുല്യമാക്കുന്നു. പോലീസ് മർദനം തകർത്തു കളഞ്ഞത് ഈ നിരപരാധിയുടെ ആരോഗ്യവും ജീവിതവുമാണ്. കോഴിക്കോട് വലിയങ്ങാടിക്കടുത്തു ഇപ്പോഴും ജയേഷ് ഉണ്ട്. പോലീസ് ക്രൂരതയുടെ ബാക്കിപത്രമായി.