കുചേലനായി വിസ്മയിപ്പിക്കാൻ ജയറാം; ശ്രദ്ധ നേടി നമോ പോസ്റ്റർ.

മലയാളികളുടെ പ്രീയപ്പെട്ട താരം ജയറാമിന്റെ ഞെട്ടിക്കുന്ന മേക് ഓവർ കണ്ടു അമ്പരന്നിരിക്കുകയാണ് ഇപ്പോൾ സിനിമാ പ്രേമികൾ. വിജീഷ് മണി സംവിധാനം ചെയ്യുന്ന നമോ എന്ന ചിത്രത്തിലാണ് തല മൊട്ടയടിച്ച ജയറാം എത്തുന്നത്. ശ്രീകൃഷ്ണന്റെയും കുചേലന്റെയും കഥയാണ് ചിത്രം പറയുന്നത് എന്നാണ് സൂചന. കുചേല കഥാപാത്രത്തെ കേന്ദ്രീകരിച്ചു ഒരുക്കുന്ന ഈ ചിത്രത്തിൽ കുചേല വേഷത്തിലാണ് ജയറാം എത്തുന്നത് എന്നാണ് വിവരം. സംസ്കൃതത്തിലാണ് ഈ ചിത്രം ഒരുക്കുന്നത് എന്നും ഇതിന്റെ പോസ്റ്റർ നമ്മളോട് പറയുന്നു. അനശ്വര ചാരിറ്റബിൾ ട്രസ്റ്റ് അവതരിപ്പിക്കുന്ന ഈ ചിത്രത്തിന്റെ പോസ്റ്ററും ജയറാമിന്റെ ലുക്കും ഏറെ ശ്രദ്ധ നേടുകയാണ്. അനൂപ് ജലോട്ട സംഗീതമൊരുക്കുന്ന ഈ ചിത്രത്തിന് ദൃശ്യങ്ങൾ നൽകിയത് എസ് ലോകനാഥൻ ആണ്. യു പ്രസന്ന കുമാർ, ഡോക്ടർ എസ് എൻ മഹേഷ് ബാബു എന്നിവർ ചേർന്ന് തിരക്കഥ രചിച്ച ഈ ചിത്രം എഡിറ്റ് ചെയ്തിരിക്കുന്നത് ബി ലെനിൻ ആണ്.

ഈ ചിത്രത്തിന്റെ കഥ ഒരുക്കിയിരിക്കുന്നത് സംവിധായകൻ വിജീഷ് മണി തന്നെയാണ്. ഈ വർഷം തന്നെ റിലീസ് ചെയ്യാൻ പോകുന്ന നമോ ജയറാമിന്റെ അഭിനയ ജീവിതത്തിലെ ഏറ്റവും മികച്ച കഥാപാത്രമായി മാറുമെന്നുള്ള റിപ്പോർട്ടുകളാണ് ലഭിക്കുന്നത്. ഇപ്പോൾ തെലുങ്കു, തമിഴ് ചിത്രങ്ങളിൽ നിറഞ്ഞു നിൽക്കുകയാണ് ജയറാം. അല്ലു അർജുന് ഒപ്പം ജയറാം അഭിനയിച്ച അങ്ങ് വൈകുണ്ഠപുരത്തു എന്ന ചിത്രം സൂപ്പർ ഹിറ്റായി മാറിയിരുന്നു. അത് കൂടാതെ മണി രത്‌നം സംവിധാനം ചെയ്യുന്ന പുതിയ തമിഴ് ചിത്രമായ പൊന്നിയിൽ സെൽവനിലും ജയറാം ഒരു മുഖ്യ വേഷം ചെയ്യുന്നുണ്ട്. മലയാളത്തിലും ഒരുപിടി ചിത്രങ്ങൾ ജയറാമിനെ കാത്തിരിക്കുകയാണ്.