ആഷിഖ് അബുവിന്റെ വൈറസിന് വേണ്ടി തന്റെ ചിത്രം ഉപേക്ഷിക്കുന്നു എന്ന് സംവിധായകൻ ജയരാജ്..!

കഴിഞ്ഞ ദിവസമാണ് പ്രശസ്ത സംവിധായകൻ ആഷിഖ് അബു തന്റെ പുതിയ പ്രൊജക്റ്റ് പ്രഖ്യാപിച്ചത്. ആഷിഖ് അബു തന്നെ നിർമ്മാണവും നിർവഹിക്കുന്ന ഈ ചിത്രത്തിന്റെ പേര് വൈറസ് എന്നാണ്. കോഴിക്കോട് ഉണ്ടായ നിപ്പ ആക്രമണത്തിന്റെ പശ്ചാത്തലത്തിൽ കഥ പറയുന്ന ഒരു ചിത്രമാണ് ഇത്. ആസിഫ് അലി, ടോവിനോ തോമസ്, സൗബിൻ ഷാഹിർ, ചെമ്പൻ വിനോദ് , ദിലീഷ് പോത്തൻ, കാളിദാസ് ജയറാം, രേവതി, പാർവതി, റിമ കല്ലിങ്ങൽ, രമ്യ നമ്പീശൻ എന്നിങ്ങനെ ഒരു വലിയ താരനിരയെ തന്നെ അണിനിരത്തിയാണ് ആഷിക് അബു ഈ ചിത്രം ഒരുക്കാൻ പോകുന്നത്. എന്നാൽ ഇതേ കഥാ പശ്ചാത്തലത്തിൽ തന്നെ പ്രശസ്ത സംവിധായകൻ ജയരാജ് രൗദ്രം എന്ന പേരിൽ ഒരു ചിത്രം പ്രഖ്യാപിച്ചിരുന്നു. ആ ചിത്രം ആരംഭിക്കാൻ ഉള്ള തയ്യാറെടുപ്പിലുമായിരുന്നു ജയരാജ്.

എന്നാൽ ഇപ്പോൾ അദ്ദേഹം പറയുന്നത് ഒരേ കഥ പറയുന്ന രണ്ടു ചിത്രങ്ങൾ ആവശ്യമില്ല എന്നും ആഷിഖ് ചിത്രത്തിന് വേണ്ടി തന്റെ പ്രൊജക്റ്റ് താൻ ഉപേക്ഷിക്കുകയാണ് എന്നുമാണ്. തന്നേക്കാൾ നന്നായി ഈ കഥ പ്രേക്ഷകരിലേക്ക് എത്തിക്കാൻ ആഷിഖിന് കഴിയും എന്ന് തനിക്കു പൂർണ്ണ വിശ്വാസം ഉണ്ടെന്നും ജയരാജ് പറഞ്ഞു. നിപ്പ രോഗബാധിതരെ ശുശ്രൂഷിക്കുന്നതിനിടയിൽ മരണമടഞ്ഞ ലിനി സിസ്റ്റർ ആയി റിമ കല്ലിങ്കലും മന്ത്രി കെ കെ ശൈലജ ടീച്ചർ ആയി രേവതിയും ഈ ചിത്രത്തിലെത്തും എന്നാണ് റിപ്പോർട്ടുകൾ പറയുന്നത്. മുഹ്‌സിൻ പരാരിയും സുഹാസ്- ഷറഫു ടീമും ചേർന്ന് രചന നിർവഹിക്കുന്ന ഈ ചിത്രത്തിന് കാമറ ചലിപ്പിക്കുന്നത് രാജീവ് രവിയും സംഗീതം ഒരുക്കുന്നത് സുഷിൻ ശ്യാമും, എഡിറ്റ് ചെയ്യുന്നത് സൈജു ശ്രീധരനും ആണ്. അടുത്ത വർഷം സമ്മർ വെക്കേഷൻ സമയത്തു വൈറസ് തിയേറ്ററിൽ എത്തിക്കാൻ ആണ് നീക്കം