സി ബി ഐ അഞ്ചാം ഭാഗത്തിൽ മെഗാസ്റ്റാറിനോപ്പം ജഗതി ശ്രീകുമാറും..!!

മെഗാസ്റ്റാർ മമ്മൂട്ടിയെ നായകനാക്കി കെ മധു- എസ് എൻ സ്വാമി ടീം ഒരുക്കിയ സി ബി ഐ സീരീസിലെ ചിത്രങ്ങൾ പ്രേക്ഷകർക്ക് പ്രീയപ്പെട്ടവയാണ്. ഒരു സി ബി ഐ ഡയറി കുറിപ്പ്, ജാഗ്രത, സേതുരാമയ്യർ സി ബി ഐ, നേരറിയാൻ സി ബി ഐ എന്നിവയാണ് ഈ സീരീസിലെ ചിത്രങ്ങൾ. ഇപ്പോഴിതാ ഈ ചിത്രത്തിന്റെ അഞ്ചാം ഭാഗം ഒരുക്കാനുള്ള തയാറെടുപ്പിലാണ് കെ മധുവും എസ് എൻ സ്വാമിയും. മമ്മൂട്ടിക്കൊപ്പം മുകേഷ്, ജഗതി എന്നിവരും ഈ സീരിസിന്റെ ഭാഗമാണ്. എന്നാൽ കുറച്ചു വർഷങ്ങൾക്കു മുൻപ് കാർ അപകടത്തിൽ ശരീരം തളർന്നു പോയ ജഗതി ഇപ്പോൾ ഒരുക്കാൻ പോകുന്ന സി ബി ഐ അഞ്ചാം ഭാഗത്തിൽ ഉണ്ടാവുമോ എന്ന സംശയത്തിൽ ആണ് പ്രേക്ഷകർ. പതുക്കെ അഭിനയ രംഗത്തേക്ക് തിരിച്ചു വരാൻ തയ്യാറെടുക്കുന്ന ജഗതി അഞ്ചാം ഭാഗത്തിൽ ഉണ്ടാവും എന്നാണ് ഇപ്പോൾ വരുന്ന റിപ്പോർട്ടുകൾ പറയുന്നത്.

ജഗതി അഞ്ചാം ഭാഗത്തിലും ഉണ്ടാകും എന്ന് അദ്ദേഹത്തിന്റെ മകൻ ഈ അടുത്തിടെ പറഞ്ഞിരുന്നു. ഒരു ബിഗ് ബഡ്ജറ്റ് ഇൻവെസ്റ്റിഗേഷൻ ത്രില്ലർ ആയി സി ബി ഐ അഞ്ചാം ഭാഗം ഒരുക്കാൻ ആണ് പ്ലാൻ. ഈ വർഷം അവസാനം ഈ ചിത്രത്തിൻറെ പ്രവർത്തനങ്ങൾ ആരംഭിക്കും എന്നും ചിത്രത്തിന്റെ ഒഫീഷ്യൽ പ്രഖ്യാപനം ഉടനെ ഉണ്ടാകും എന്നും റിപ്പോർട്ടുകൾ സൂചിപ്പിക്കുന്നു. ഈ അടുത്തിടെ ഒരു പരസ്യ ചിത്രത്തിലും ഒരു സിനിമയിലും ജഗതി അഭിനയിച്ചിരുന്നു. ഏതായാലും സേതുരാമയ്യറിന് ഒപ്പം തന്നെ ജഗതി ചേട്ടനേയും സ്ക്രീനിൽ കാണാൻ കാത്തിരിക്കുകയാണ് പ്രേക്ഷകർ.