സന്തോഷ് ശിവൻ- മഞ്ജു വാര്യർ ചിത്രം; ജാക്ക് ആൻഡ് ജിൽ ഫസ്റ്റ് ലുക്ക് പോസ്റ്റർ റിലീസ് ചെയ്തു മോഹൻലാൽ..!

മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യരെ കേന്ദ്ര കഥാപാത്രമാക്കി പ്രശസ്ത സംവിധായകനും ഛായാഗ്രാഹകനുമായ സന്തോഷ് ശിവൻ ഒരുക്കിയ ചിത്രമാണ് ജാക്ക് ആൻഡ് ജിൽ. കോവിഡ് പ്രതിസന്ധി കാരണം റിലീസ് വൈകിയ ഈ ചിത്രം അടുത്ത മാസം ഇരുപതിന്‌ റിലീസ് പ്രഖ്യാപിച്ചിരിക്കുകയാണ്. അതിന്റെ ഭാഗമായി ഇന്ന് വൈകുന്നേരം അഞ്ചു മണിക്ക്, ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തിരിക്കുകയാണ്. ഇന്ത്യൻ സിനിമയുടെ കംപ്ലീറ്റ് ആക്ടർ മോഹൻലാൽ ആണ് ഈ ഫസ്റ്റ് ലുക്ക് പോസ്റ്റർ പുറത്തു വിട്ടിരിക്കുന്നത്. ശ്രീ ഗോകുലം മൂവീസ്, സെവാസ് ഫിലിംസ് എന്നിവയുടെ ബാനറിൽ ഗോകുലം ഗോപാലൻ, സന്തോഷ് ശിവൻ, എം പ്രശാന്ത് ദാസ് എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രം രചിച്ചിരിക്കുന്നത് സന്തോഷ് ശിവൻ, അജിത്‌ എസ് എം എന്നിവർ ചേർന്നാണ്.

ജോയ് മൂവി പ്രൊഡക്ഷൻ ആണ് ഈ ചിത്രം കേരളത്തിൽ വിതരണം ചെയ്യുന്നത്. മഞ്ജു വാര്യർക്ക് ഒപ്പം വലിയ താരനിരയാണ് ഈ ചിത്രത്തിൽ അണിനിരക്കുന്നത്. കാളിദാസ് ജയറാം, സൗബിൻ ഷാഹിർ, നെടുമുടി വേണു, എസ്തർ അനിൽ, ബേസിൽ ജോസെഫ്, ഇന്ദ്രൻസ്, അജു വർഗീസ്, സേതുലക്ഷ്മി  എന്നിവരും അഭിനയിച്ച ഈ ചിത്രത്തിന് പിന്നിൽ ബോളിവുഡ്- ഹോളിവുഡ് സാങ്കേതിക വിദഗ്ദർ ആണ് പ്രവർത്തിച്ചിരുന്നത്. സന്തോഷ് ശിവൻ തന്നെ ഛായാഗ്രഹണവും നിർവഹിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് രഞ്ജിത് ടച്ച് റിവർ ആണ്. ജേക്സ് ബിജോയ്, ഗോപി സുന്ദർ, റാം സുരീന്ദർ എന്നിവരാണ് ഈ ചിത്രത്തിന് വേണ്ടി സംഗീതം ഒരുക്കിയത്. അനന്തഭദ്രം, ഉറുമി എന്നിവയാണ് മുൻപ് സന്തോഷ് ശിവൻ മലയാളത്തിൽ ഒരുക്കിയ വലിയ ചിത്രങ്ങൾ.