ക്ലീൻ യു സർട്ടിഫിക്കറ്റുമായി ഒരു കടത്ത് നാടൻ കഥ; റിലീസ് ഉടൻ..!

പ്രശസ്ത യുവ നടനായ ഷഹീൻ സിദ്ദിഖ് നായക വേഷത്തിൽ എത്തുന്ന പുതിയ ചിത്രമാണ് ഒരു കടത്ത് നാടൻ കഥ. നവാഗത സംവിധായകൻ ആയ പീറ്റർ സാജൻ സംവിധാനം നിർവഹിച്ച ഈ ചിത്രം റിലീസിന് ഒരുങ്ങുകയാണ്. അടുത്തയാഴ്ച റിലീസ് ചെയ്യുമെന്ന് പ്രതീക്ഷിക്കപ്പെടുന്ന ഈ ചിത്രത്തിന്റെ സെൻസറിങ് ഇന്ന് കഴിഞ്ഞു. ക്ലീൻ യു സർട്ടിഫിക്കറ്റ് ആണ് ഈ ത്രില്ലർ ചിത്രത്തിന് ലഭിച്ചിരിക്കുന്നത്. നടൻ സിദ്ദിഖിന്റെ മകൻ ആയ ഷഹീൻ സിദ്ദിഖിന്റെ കരിയറിൽ ഒരു വഴിത്തിരിവാകും എന്ന് പ്രതീക്ഷിക്കപ്പെടുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത് ജനപ്രിയ നായകൻ ദിലീപ് ആണ്. വലിയ താരനിരയാണ് ഈ ചിത്രത്തിൽ പ്രത്യക്ഷപ്പെടുന്നത്.

ഷഹീൻ സിദ്ദിഖിന് ഒപ്പം പ്രദീപ് റാവത്, സലിം കുമാർ, സുധീർ കരമന, ബിജു കുട്ടൻ, നോബി, ശശി കലിംഗ, കോട്ടയം പ്രദീപ്, സാജൻ പള്ളുരുത്തി, എഴുപുന്ന ബൈജു, അബു സലിം, പ്രശാന്ത് പുന്നപ്ര, അഭിഷേക്, രാജ്‌കുമാർ, ജയാ ശങ്കർ, ആര്യ അജിത്, പ്രസീദ, സാവിത്രി ശ്രീധരൻ, സരസ ബാലുശ്ശേരി, അഞ്ജന അപ്പുക്കുട്ടൻ, രാംദാസ് തിരുവില്വാമല, ഷഫീക് എന്നിവരും അഭിനയിക്കുന്ന ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത് പ്രശസ്ത സംഗീത സംവിധായകൻ അൽഫോൻസ് ജോസഫ് ആണ്. നീരാഞ്ജനം സിനിമാസിന്റെ ബാനറിൽ റിഥേഷ് കണ്ണൻ നിർമ്മിച്ച ഈ ചിത്രത്തിന്റെ രചന നിർവഹിച്ചിരിക്കുന്നത് സംവിധായകനൊപ്പം ചേർന്നു അനൂപ് മാധവ് ആണ്. ആധാർ കാർഡിന്റെ മാതൃകയിൽ ഉള്ള വ്യത്യസ്ത കാരക്റ്റെർ പോസ്റ്ററുകൾ ഈ ചിത്രത്തിന് സോഷ്യൽ മീഡിയയിൽ ശ്രദ്ധ നേടിക്കൊടുത്തിരുന്നു.