ഇനി ഫീൽ ഗുഡ് അല്ല, ത്രില്ലർ; പുതിയ ജിസ് ജോയ് ചിത്രത്തിന്റെ പേരും ഫസ്റ്റ് ലുക്ക് പോസ്റ്ററുമെത്തി..!

മലയാളത്തിലെ സൂപ്പർ ഹിറ്റ് സംവിധായകരിൽ ഒരാളാണ് ജിസ് ജോയ്. സൺ‌ഡേ ഹോളിഡേ, വിജയ് സൂപ്പറും പൗർണ്ണമിയും തുടങ്ങിയ ഹിറ്റ് ചിത്രങ്ങൾ നമുക്ക് സമ്മാനിച്ച ആളാണ് അദ്ദേഹം. എന്നാൽ ഫീൽ ഗുഡ് ചിത്രങ്ങൾ മാത്രമാണ് അദ്ദേഹം ചെയ്യുന്നത് എന്നൊരു വിമർശനം അദ്ദേഹത്തിനെതിരെ സോഷ്യൽ മീഡിയയിൽ ഉണ്ടായിരുന്നു. ഏതായാലും ഇപ്പോൾ തന്റെ ഫീൽ ഗുഡ് ശൈലിയിൽ നിന്നും മാറി ഒരു ത്രില്ലർ ചിത്രവുമായി എത്തുകയാണ് ജിസ് ജോയ്. ഈ ചിത്രത്തിന്റെ പേരും ഫസ്റ്റ് ലുക്ക് പോസ്റ്ററും ഇന്ന് വൈകുന്നേരം ആറു മണിക്ക് പുറത്തു വിട്ടു. ഇന്നലെ വരെ എന്നാണ് ഈ ചിത്രത്തിന് നൽകിയിരിക്കുന്ന പേര്. സൂപ്പർ ഹിറ്റ് ചിത്രങ്ങൾ രചിച്ച ബോബി- സഞ്ജയ് ടീം തിരക്കഥ രചിച്ച ഈ ചിത്രത്തിൽ ആസിഫ് അലി, ആന്റണി വർഗീസ്, നിമിഷാ സജയൻ, റീബ മോണിക്ക ജോൺ എന്നിവരാണ് പ്രധാന വേഷങ്ങൾ ചെയ്തിരിക്കുന്നത്.

സെൻട്രൽ അഡ്വെർടൈസിങ് എന്ന ബാനറിൽ മാത്യു ജോര്ജ് ആണ് ഈ ചിത്രം നിർമ്മിച്ചിരിക്കുന്നത്. ബാഹുൽ രമേശ് ക്യാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്യുന്നത് രതീഷ് രാജ് ആണ്. ഒപ്പം എന്ന ബ്ലോക്ക്ബസ്റ്റർ മോഹൻലാൽ- പ്രിയദർശൻ ചിത്രത്തിലെ ഗാനങ്ങൾ ഒരുക്കി കയ്യടി നേടിയ ടീം 4 മ്യൂസിക്സ് ആണ് ഈ ചിത്രത്തിന് വേണ്ടി സംഗീത വിഭാഗം കൈകാര്യം ചെയ്യുന്നത്. ജിസ് ജോയ്ക്കു ഒപ്പം ഇത് അഞ്ചാമത്തെ ചിത്രത്തിൽ ആണ് ആസിഫ് അലി എത്തുന്നത്. ജിസ് ജോയ് ഒരുക്കിയ ആദ്യ ചിത്രമായ ബൈസൈക്കിൾ തീവ്സിൽ ആസിഫ് അലി ആയിരുന്നു നായകൻ. അതിനു ശേഷം സൺ‌ഡേ ഹോളിഡേ, വിജയ് സൂപ്പറും പൗർണ്ണമിയും എന്നീ ജിസ് ജോയ് ചിത്രങ്ങളിലും നായകൻ ആയ ആസിഫ് അലി, മോഹൻകുമാർ ഫാൻസ്‌ എന്ന ജിസ് ജോയ്- കുഞ്ചാക്കോ ബോബൻ ചിത്രത്തിൽ അതിഥി വേഷത്തിലുമെത്തി.