ജീത്തു ജോസഫ് കളരിയിൽ നിന്നൊരു സംവിധായകൻ; ദൃശ്യം പോലെയാവുമോ ഇനി ഉത്തരവും; മറുപടി നൽകി അപർണ്ണ ബാലമുരളി

മികച്ച നടിക്കുള്ള ദേശീയ പുരസ്‍കാരം നേടിയ അപർണ്ണ ബാലമുരളി നായികാ വേഷം ചെയ്ത ഏറ്റവും പുതിയ ചിത്രമാണ് ഇനി ഉത്തരം. നാളെ പ്രേക്ഷകരുടെ മുന്നിലെത്തുന്ന ഈ ചിത്രം ഒരു ഫാമിലി ത്രില്ലറായാണ് ഒരുക്കിയിരിക്കുന്നത്. ജാനകി എന്ന കഥാപാത്രമായി അപർണ്ണ അഭിനയിച്ച ഈ ചിത്രത്തിന്റെ ട്രൈലെർ പ്രേക്ഷകരെ ആകാംഷയുടെ മുൾമുനയിൽ നിർത്തുന്ന ഒന്നായിരുന്നു. സൂപ്പർ ഹിറ്റ് സംവിധായകനും ത്രില്ലർ ചിത്രങ്ങളുടെ തമ്പുരാനുമായ ജീത്തു ജോസഫിന്റെ ചീഫ് അസോസിയേറ്റായി ജോലി ചെയ്തിട്ടുള്ള സുധീഷ് രാമചന്ദ്രൻ ആണ് ഈ ചിത്രം സംവിധാനം ചെയ്തിരിക്കുന്നത്. അത്കൊണ്ട് തന്നെ ജീത്തു ജോസഫിന്റെ ത്രില്ലറുകളായ ദൃശ്യവും ദൃശ്യം 2 ഒക്കെ പോലെ പ്രേക്ഷകരെ ആദ്യാവസാനം ത്രില്ലടിപ്പിക്കുന്ന ചിത്രമായിരിക്കുമോ ഇനി ഉത്തരവുമെന്ന ചോദ്യത്തിന് മറുപടി നൽകുകയാണ് അപർണ്ണ ബാലമുരളി.

ഓൺലൂകേർസ് മീഡിയക്ക് നൽകിയ അഭിമുഖത്തിലാണ് അപർണ്ണ ബാലമുരളി ഈ ചിത്രത്തെ കുറിച്ച് മനസ്സ് തുറന്നത്. ജീത്തു ജോസഫ് ചത്രങ്ങളെ പോലെ തന്നെ പ്രേക്ഷകരെ ഏറെ ത്രില്ലടിപ്പിക്കുന്ന ഒരു ചിത്രം തന്നെയാവും ഇനി ഉത്തരമെന്നാണ് അപർണ പറയുന്നത്. ഇതിന്റെ ഗംഭീരമായ തിരക്കഥ തന്നെയാണ് തന്നെ ഈ ചിത്രത്തിലേക്ക് ആകർഷിച്ചതെന്നും വളരെ ശ്കതമായ ഒരു കഥാപാത്രമാണ് ഇതിൽ താനവതരിപ്പിച്ച ജാനകി എന്നും അപർണ്ണ പറയുന്നു. ഒരു ത്രില്ലർ ചിത്രത്തിൽ നിന്നും പ്രേക്ഷകർ പ്രതീക്ഷിക്കുന്ന എല്ലാം ഇനി ഉത്തരത്തിൽ നിന്ന് അവർക്ക് ലഭിക്കുമെന്നും അപർണ്ണ കൂട്ടിച്ചേർത്തു. ഇരട്ട തിരക്കഥാകൃത്തുക്കളായ രഞ്ജിത്- ഉണ്ണി ടീം രചിച്ച ഈ ചിത്രം എ ആന്‍ഡ് വി എന്റർടെയ്ൻമെന്റിന്റെ ബാനറിൽ വരുൺ, അരുൺ എന്നിവർ ചേർന്നാണ് നിർമ്മിച്ചത്.