ഇന്ത്യൻ ഫുട്ബോൾ ടീം ക്യാപ്റ്റനും ഏട്ടനായി മലയാളികളുടെ സ്വന്തം മോഹൻലാൽ..!

ഇന്ത്യൻ സിനിമയിലെ എക്കാലത്തെയും മികച്ച നടൻ ആയാണ് മോഹൻലാൽ കരുതപ്പെടുന്നത്. ബോളിവുഡ് ഇതിഹാസം അമിതാഭ് ബച്ചൻ അടക്കം ഇന്ത്യൻ സിനിമയിലെ പല പ്രമുഖ നടീനടൻമാരും സാങ്കേതിക പ്രവർത്തകരും മോഹൻലാലിനെ ഒരുപാട് ആരാധിക്കുന്നവർ ആണ്. കേരളത്തിന്റെ ചരിത്രം പരിശോധിച്ചാൽ തന്നെ ഇന്ത്യയിൽ ഏറ്റവും പോപ്പുലർ ആയ മലയാളി എന്ന സ്ഥാനവും മോഹൻലാലിന് സ്വന്തമാണ്. മോഹൻലാലിനെ ഇഷ്ടപ്പെടുന്നവരിൽ സിനിമാ താരങ്ങൾക്ക് പുറമെ സ്പോർട്സ് രംഗത്തെ സൂപ്പർ സ്റ്റാറുകളും ഉണ്ട്. മുൻ ഇന്ത്യൻ ക്രിക്കറ്റ് താരം വീരേന്ദർ സെവാഗ്, ഒളിമ്പിക് മെഡൽ ജേതാവും കേന്ദ്ര മന്ത്രിയുമായ രാജ്യവർഥൻ സിങ് റാത്തോഡ്, ഇന്ത്യയുടെ അഭിമാനമായ ബോക്സിങ് താരം വിജേന്ദർ സിങ് എന്നിവർ മോഹൻലാലിനോട് ഉള്ള തങ്ങളുടെ ബഹുമാനം പ്രകടിപ്പിച്ചിട്ടുണ്ട്. ഇപ്പോൾ ആ ലിസ്റ്റിൽ എത്തിയിരിക്കുന്നത് ഇന്ത്യൻ ഫുട്ബോൾ ടീം ക്യാപ്റ്റനും ഇന്ത്യൻ ഫുട്ബോളിലെ സൂപ്പർ സ്റ്റാറുമായ സുനിൽ ഛേത്രി ആണ്. ഇന്ത്യൻ ഫുട്ബോൾ ടീം ക്യാപ്റ്റന് വരെ മലയാളികളുടെ ലാലേട്ടൻ ഏട്ടനായി മാറി എന്നാണ് സോഷ്യൽ മീഡിയ പറയുന്നത്.

കഴിഞ്ഞ വെള്ളിയാഴ്ച ആണ് സുനിൽ ഛേത്രി തന്റെ ജന്മദിനം ആഘോഷിച്ചത്. ലോകമെമ്പാട് നിന്നുമുള്ള ആരാധകരും സുഹൃത്തുക്കളും സെലിബ്രിറ്റികളും ഛേത്രിക്കു ജന്മദിന ആശംസകൾ അറിയിച്ചു കൊണ്ട് സോഷ്യൽ മീഡിയയിലൂടെ രംഗത്ത് വന്നു. ഒപ്പം മോഹൻലാലും തന്റെ ട്വിറ്റർ അക്കൗണ്ടിലൂടെ സുനിൽ ഛേത്രിക്കു ജന്മദിനാശംസകൾ നേർന്നു. എന്നാൽ ഏവരെയും അത്ഭുതപ്പെടുത്തിക്കൊണ്ടു ആ ആശംസക്കു മറുപടിയായി ട്വിറ്ററിലൂടെ തന്നെ താങ്ക്‌ യൂ സോ മച് ലാലേട്ടാ എന്നാണ് സുനിൽ ഛേത്രി ട്വീറ്റ് ചെയ്തത്. മോഹൻലാൽ ആരാധകർ മുതൽ, വർഷങ്ങളായി അദ്ദേഹത്തെ അറിയുന്നവരും സ്നേഹിക്കുന്നവരും വിളിക്കുന്ന ലാലേട്ടൻ എന്ന പേരിൽ തന്നെ അദ്ദേഹത്തെ സംബോധന ചെയ്ത് കൊണ്ട് ഛേത്രി നൽകിയ മറുപടി ഇപ്പോൾ സോഷ്യൽ മീഡിയയിൽ തരംഗമാണ്. കാരണം, കേരളത്തിന് പുറത്തു നിന്നുള്ള സെലിബ്രിറ്റികൾ പലരും മോഹൻലാൽ സർ എന്ന് ബഹുമാനത്തോടെ അദ്ദേഹത്തെ അഭിസംബോധന ചെയ്യുമ്പോൾ, സുനിൽ ഛേത്രി നമ്മൾ മലയാളികളെ പോലെ തന്നെ ഒരുപാട് സ്നേഹത്തോടെ ലാലേട്ടാ എന്ന് വിളിച്ചാണ് അദ്ദേഹത്തെ അഭിസംബോധന ചെയ്തത് എന്നതാണ് ഏവരേയും ഒരുപാട് അത്ഭുതപ്പെടുത്തിയതും സന്തോഷിപ്പിച്ചതും.