മോഹൻലാലിന് താല്പര്യമുണ്ടെങ്കിൽ എന്റെ സിനിമയിൽ അഭിനയിക്കാം, എനിക്ക് താല്പര്യം ഇല്ല : ഡോക്ടർ ബിജു

തന്റെ സിനിമകളിൽ അഭിനയിക്കാൻ താൽപര്യം ഇല്ലെന്ന് വ്യക്തമാക്കിയ മോഹൻലാലിന് മറുപടിയുമായി ഡോ. ബിജു രംഗത്ത്. ഒരു ഓൺലൈൻ മാധ്യമത്തിന് നൽകിയ അഭിമുഖത്തിലായിരുന്നു ബിജുവിന്റെ പ്രതികരണം. എന്റെ സിനിമയില്‍ ആര് അഭിനയിച്ചാലും അത് കാണിക്കുന്നത് അന്താരാഷ്ട്ര വേദികളിലാണ്. യൂറോപ്യന്‍ രാജ്യങ്ങളിലും അമേരിക്കയിലുമൊക്കെയാണ്. അവിടെ ആര്‍ക്കും മോഹന്‍ലാലിനെനേയോ മമ്മൂട്ടിയെയോ അറിയില്ലെന്ന് ബിജു പ്രതികരിച്ചു.

ഒരു പക്ഷേ മോഹന്‍ലാല്‍ അഭിനയിച്ചതു കൊണ്ട് കേരളത്തില്‍ ഒരു മൈലേജ് ഉണ്ടാകുമെന്നുള്ളതല്ലാതെ മറ്റൊന്നും സംഭവിക്കാനില്ല. മോഹന്‍ലാലിന് താല്പര്യം ഉണ്ടെങ്കില്‍ എന്‍റെ സിനിമകളില്‍ അഭിനയിക്കാം എന്നല്ലാതെ എനിക്ക് വലിയ താല്പര്യം ഒന്നും ഇല്ല എന്നും ഡോ. ബിജു വ്യക്തമാക്കി. എന്നെ സംബന്ധിച്ചിടത്തോളം സിനിമയുടെ ക്വാളിറ്റിയാണ് വിഷയം. അന്താരാഷ്ട്ര വേദികളിലും അങ്ങനെ തന്നെ. നമ്മളോട് സഹകരിക്കാന്‍ താല്‍പ്പര്യമുള്ളവര്‍ സഹകരിക്കും. അല്ലാത്തവര്‍ സഹകരിക്കില്ല, അത്രേയുള്ളൂവെന്നും അദ്ദേഹം പറഞ്ഞു.

ഡോ. ബിജു തന്നെ കഥപറഞ്ഞുകേള്‍പ്പിക്കാനായി എത്തിയിരുന്നെന്നും എന്നാല്‍ കഥ കേള്‍ക്കുന്നതിനിടെയുണ്ടായ തന്റെ ചില സംശയങ്ങള്‍ക്ക് മറുപടി പറയാന്‍ ബിജുവിന് സാധിച്ചിരുന്നില്ലെന്നും അതുകൊണ്ടാണ് സിനിമ ഉപേക്ഷിച്ചതെന്നും മോഹന്‍ലാല്‍ പറഞ്ഞിരുന്നു. ആ ഒരു സിനിമയില്‍ അഭിനയിച്ചില്ല എന്നുവച്ച് എനിക്കൊന്നും സംഭവിക്കാന്‍ പോകുന്നില്ല. അതേപോലെ തന്നെ അതില്‍ അഭിനയിച്ചു എന്നുവച്ചും ഒന്നും സംഭവിക്കില്ല. അങ്ങനെയുള്ള ഒരു സിനിമയാണെന്ന് കഥ കേട്ടപ്പോള്‍ തോന്നി. കഥ കേട്ടപ്പോള്‍ ത്രില്ലിങ് ആയി എനിക്കൊന്നും തോന്നിയില്ല. ഡോ. ബിജുവിന്റെ പേഴ്‌സണല്‍ ഫിലിമാണത്. തീര്‍ച്ചയായും അത്തരം സിനിമകള്‍ നമുക്ക് ചെയ്യാം. മുമ്പ് ചെയ്തിട്ടുമുണ്ട്. പക്ഷേ, അത്രയ്ക്ക് ബ്രില്യന്റായിരിക്കണം. ഒരു വാസ്തുഹാരയോ ഒരു വാനപ്രസ്ഥമോ. അല്ലാതെ മനഃപൂര്‍വം ഒരു ആര്‍ട്ട്ഹൗസ് സിനിമയില്‍ അഭിനയിച്ചു കളയാം എന്നുവച്ച് അഭിനയിക്കേണ്ട കാര്യം ഇന്നത്തെ നിലയ്ക്ക് തനിക്കില്ലെന്നും മോഹൻലാൽ വ്യക്തമാക്കിയിരുന്നു.