ദുൽഖർ സൽമാനൊപ്പം അഭിനയിക്കണം എന്ന സ്വപ്നവുമായി ബോളിവുഡ് നടി ഫ്ലോറ സൈനി..!

മലയാളത്തിന്റെ യുവ താരമായ ദുൽഖർ സൽമാൻ ഇപ്പോൾ തമിഴ്, തെലുങ്കു, ഹിന്ദി ചിത്രങ്ങളിലും അഭിനയിക്കുന്നുണ്ട്. ദുൽഖറിന്റെ ആദ്യ ഹിന്ദി ചിത്രമായ കർവാൻ ബോക്സ് ഓഫീസിൽ വലിയ ചലനങ്ങൾ സൃഷ്ടിച്ചില്ലെങ്കിലും നിരൂപക പ്രശംസ നേടിയിരുന്നു. ഇപ്പോൾ സോനം കപൂർ പ്രധാന വേഷത്തിൽ എത്തുന്ന സോയ ഫാക്ടർ എന്ന ഹിന്ദി ചിത്രത്തിൽ അഭിനയിക്കുന്ന ദുൽഖർ സൽമാൻ ബോളിവുഡിൽ ഏറെ ശ്രദ്ധ നേടുന്നുണ്ട്. ഇപ്പോഴിതാ ഒരു ബോളിവുഡ് നായിക പറയുന്നത് കേൾക്കു. തെന്നിന്ത്യയിൽ നിന്ന് ബോളിവുഡിൽ എത്തിയ ഫ്ലോറ സൈനി എന്ന നായിക പറയുന്നത് ദുൽഖർ സൽമാനൊപ്പം അഭിനയിക്കുക എന്നത് വലിയൊരു ആഗ്രഹമാണ് എന്നാണ്. ബോളിവുഡിലെ ഏറ്റവും പുതിയ ഹൊറർ ചിത്രങ്ങളിൽ ഒന്നായ സ്ത്രീയിൽ പ്രേതം ആയാണ് ഫ്ലോറ അഭിനയിച്ചിരിക്കുന്നത്.

മമ്മൂട്ടിയുടെ മകൻ ദുൽഖർ സൽമാനൊപ്പം അഭിനയിക്കണം എന്ന് ആഗ്രഹമുണ്ടെന്നും ദുൽഖർ വളരെ സുന്ദരനാണെന്നും ഫ്ലോറ പറയുന്നു. ദുൽഖറിന്റെ കർവാൻ എന്ന ഹിന്ദി ചിത്രം തനിക്കു വളരെയധികം ഇഷ്ടപ്പെട്ടു എന്നും ഫ്ലോറ പറഞ്ഞു. അതുപോലെ മമ്മൂട്ടിക്കൊപ്പവും അഭിനയിക്കാൻ ആഗ്രഹമുണ്ടെന്ന് ഫ്ലോറ സൈനി പറയുന്നു. പക്ഷെ ദുൽഖർ സൽമാൻ തന്നെയാണ് ഫ്ലോറയുടെ ഫേവറിറ്റ്. ഹിന്ദി കൂടാതെ കന്നഡ, തെലുങ്ക്, തമിഴ് സിനിമകളിലും ഫ്ലോറ അഭിനയിച്ചിട്ടുണ്ട്. മലയാളത്തിൽ അഭിനയിക്കില്ല എന്ന വാശിയൊന്നും ഇല്ലെന്നും ഒന്ന് രണ്ടു അവസരങ്ങൾ ഒത്തു വന്നെങ്കിലും അത് നടക്കാതെ പോയി എന്നും ഫ്ലോറ വെളിപ്പെടുത്തി. തെന്നിന്ത്യൻ സിനിമയുടെ കൂടെ ഭാഗമായി നില്ക്കാൻ ആണ് താൻ ആഗ്രഹിക്കുന്നത് എന്നാണ് ഫ്ലോറ പറയുന്നത്. ഫ്ലോറ അഭിനയിച്ച ഹിന്ദി ചിത്രം ആയ സ്ത്രീയിൽ ശ്രദ്ധ കപൂർ, രാജ്‌കുമാർ റാവു എന്നിവരാണ് നായികയും നായകനും ആയി എത്തിയത്. മറാത്തി ചിത്രമായ പരീ ഹൂം മേം എന്ന ചിത്രത്തിലും ഈ നടി അഭിനയിച്ചിട്ടുണ്ട്.