ഫുട്ബോൾ ദൈവം മറഡോണയ്ക്കൊപ്പം നിന്ന അതേ ഫീൽ ദളപതിയ്‌ക്കൊപ്പം നിന്നപ്പോഴും: ഐ.എം വിജയൻ

ഇന്ത്യൻ ഫുട്ബോൾ ചരിത്രത്തിലെ ഇതിഹാസ താരങ്ങളിൽ ഒരാൾ ആണ് മലയാളികളുടെ കറുത്ത മുത്തായ ഐ എം വിജയൻ. ഫുട്ബോളിൽ നിന്നു വിരമിച്ച ശേഷം കേരളാ പോലീസിൽ ജോലി ചെയ്യുന്ന വിജയൻ സിനിമാ നടൻ ആയും ഏറെ പ്രശസ്തനാണ്. ഇപ്പോഴിതാ ദളപതി വിജയ് നായകനായി എത്തുന്ന ബിഗിൽ എന്ന ചിത്രത്തിൽ വിജയ്ക്കൊപ്പം ഒരു നിർണായക വേഷം ചെയ്യുകയാണ് ഐ എം വിജയൻ. വിജയ്ക്ക് ഒപ്പമുള്ള ഷൂട്ടിങ് അനുഭവങ്ങൾ പങ്ക് വെക്കുകയാണ് വിജയൻ. ആറ്റ്‌ലി ഒരുക്കുന്ന വിജയ് ചിത്രത്തിലേക്ക് ക്ഷണം വന്നപ്പോൾ തന്നെ ആവേശഭരിതനായി താനെന്നും ഫുട്‌ബോൾ കളിയുടെ പശ്ചാത്തലത്തിൽ പറയുന്ന കഥ കൂടി ആയപ്പോൾ ആവേശം ഇരട്ടി ആയെന്നും അദ്ദേഹം പറയുന്നു.

കടുത്ത ഒരു വിജയ് ആരാധകൻ ആണ് താനെന്നും വിജയ് എന്ന കലാകാരന്റെ മഹത്വം അദ്ദേഹം പുലർത്തുന്ന എളിമ ആണെന്നും വിജയൻ പറയുന്നു. ആക്ഷൻ രംഗങ്ങളിലെ അദ്ദേഹത്തിന്റെ പ്രകടനം കാണുമ്പോൾ സ്റ്റൈൽ മന്നൻ എന്നു തന്നെ അദ്ദേഹത്തെ വിളിക്കാൻ തോന്നും എന്നും ഐ എം വിജയൻ പറഞ്ഞു. ആദ്യമായി അദ്ദേഹത്തിന്റെ മുന്നിൽ എത്തിയപ്പോൾ താൻ അക്ഷരാർത്ഥത്തിൽ വിറക്കുകയായിരുന്നു എന്നും എന്നാൽ അദ്ദേഹം ഇങ്ങോട്ട് വന്നു തനിക്കു ഹസ്തദാനം തന്നു കൊണ്ട്, ഈ ചിത്രത്തിൽ അഭിനയിക്കാൻ സമ്മതിച്ചതിനു തന്നോട് നന്ദി പറയുകയാണ് ഉണ്ടായത് എന്നും ഐ എം വിജയൻ ഓർത്തെടുക്കുന്നു. തന്റെയും വിജയ്‍യുടെയും കഥാപാത്രങ്ങളെ കുറിച്ചു കൂടുതൽ പറയാൻ അദ്ദേഹം തയ്യാറായില്ല. അതെല്ലാം സിനിമ വരുബോൾ കാണാം എന്നു പറയുന്നു ഐ എം വിജയൻ. വുമൺസ് ഫുട്ബോൾ ആണ് ഈ ചിത്രത്തിൻറെ കഥാ പശ്ചാത്തലം.