ചെറുപ്പം മുതലേ വിജയ് ആരാധിക; മനസ്സ് തുറന്ന് ബേബി അനിക സുരേന്ദ്രൻ..!

ഒട്ടേറെ മലയാളം- തമിഴ് ചിത്രങ്ങളിലൂടെ പ്രേക്ഷകരുടെ മനസ്സു കീഴടക്കിയ ബാലതാരമാണ് ബേബി അനിക സുരേന്ദ്രൻ. തമിഴിൽ തല അജിത്തിന് ഒപ്പം അഭിനയിച്ച എന്നൈ അറിന്താൽ, വിശ്വാസം എന്നീ ചിത്രങ്ങളിലെ പ്രകടനം ഈ പ്രതിഭയ്ക്ക് തെന്നിന്ത്യ മുഴുവൻ വലിയ പ്രശംസയാണ് നേടിക്കൊടുത്തത്. ഇപ്പോഴിതാ ഇന്ത്യ ഗ്ലിറ്റ്‌സ് തമിഴ് യൂട്യൂബ് ചാനലിന് നൽകിയ അഭിമുഖത്തിൽ തന്റെ ഇഷ്ടങ്ങൾ വെളിപ്പെടുത്തുകയാണ് ഈ കുട്ടി താരം. താൻ ചെറുപ്പം മുതൽ ദളപതി വിജയ്‌യുടെ ആരാധിക ആണെന്നും ഇപ്പോഴും ആ ആരാധന തുടരുകയാണെന്നും അനിക പറയുന്നു. വിജയ്‌യുടെ ഡാൻസും സംഘട്ടനവും തനിക്ക് ഏറെ ഇഷ്ടമാണെന്ന് പറയുന്ന ഈ നടി, വിജയ് എന്ന മനുഷ്യന്റെ ശാന്തമായ സ്വഭാവവും തനിക്ക് ഏറെ ഇഷ്ടമെന്നു വെളിപ്പെടുത്തുന്നു. അദ്ദേഹത്തോടൊപ്പം അഭിനയിക്കുക എന്നതാണ് വലിയ സ്വപ്നമെന്നും അനിക പറയുന്നു.

തല അജിത്തിനെ തനിക്ക് എപ്പോഴും ഒരുപാട് ഇഷ്ടമാണെന്ന് പറഞ്ഞ അനിക പറയുന്നത് മലയാളത്തിൽ തനിക്ക് ഏറെയിഷ്ടം ദുൽഖർ സൽമാൻ, ടോവിനോ തോമസ് എന്നിവരെയാണെന്നാണ്. ടോവിനോ തോമസിനോട് ഒരു ക്രഷ് തോന്നിയിട്ടുണ്ട് എന്നും അദ്ദേഹത്തിന്റെ ലൂക്ക എന്ന ചിത്രം ഏറെയിഷ്ടമാണെന്നും അനിക പറയുന്നു. അധികം വൈകാതെ തന്നെ നായികയായി അരങ്ങേറ്റം കുറിക്കാൻ തനിക്ക് കഴിയുമെന്ന പ്രതീക്ഷയും ഈ നടി പങ്കു വെക്കുന്നു. നായികമാരിൽ തന്റെ റോൾ മോഡൽസ് ലേഡി സൂപ്പർ സ്റ്റാർ നയൻതാരയും ബോളിവുഡ് താരം സുന്ദരി ദീപിക പദുക്കോണും ആണെന്നും അനിക തുറന്നു പറഞ്ഞു. മോഹൻലാൽ നായകനായ അൻവർ റഷീദ് ചിത്രം ചോട്ടാ മുംബൈയിലൂടെ 2007 ഇൽ അരങ്ങേറ്റം കുറിച്ച ഈ ബാലതാരം പിന്നീട് മമ്മൂട്ടി, ജയറാം, ദുൽഖർ തുടങ്ങിയവർക്കൊപ്പവും അഭിനയിച്ചു.

ഫോട്ടോ കടപ്പാട്: Rahul Photography