വമ്പൻ കട്ട് ഔട്ടുകൾ ഉയർന്നു തുടങ്ങി; ഇനി മാമാങ്ക മഹോത്സവത്തിനുള്ള ദിവസങ്ങൾ

മെഗാ സ്റ്റാർ മമ്മൂട്ടി നായകനായി എത്തുന്ന മാമാങ്കം എന്ന ചിത്രത്തിന്റെ റിലീസ് ഡിസംബർ പന്ത്രണ്ടിന് ആണ്. ഇനി ദിവസങ്ങൾ മാത്രം ശേഷിക്കെ മമ്മൂട്ടി ആരാധകർ ഏറെ ആവേശത്തിൽ ആണ്. മെഗാ സ്റ്റാറിന്റെ കരിയറിലെ ഏറ്റവും വലിയ ചിത്രം എന്ന വിശേഷണവും ആയി എത്തുന്ന മാമാങ്കത്തിന് വമ്പൻ വരവേൽപ്പ് നൽകാനുള്ള ഒരുക്കത്തിൽ ആണ് ആരാധകർ. അതിന്റെ ഭാഗം ആയി ആഘോഷപൂർവം മമ്മൂട്ടിയുടെ വമ്പൻ കട്ട് ഔട്ടുകൾ കേരളമെങ്ങും ഉയർത്തുകയാണ് മമ്മൂട്ടി ആരാധകർ. കഴിഞ്ഞ ദിവസം തൃശൂരിലെ പ്രശസ്തമായ രാഗം തീയേറ്ററിൽ മമ്മൂട്ടിയുടെ മാമാങ്കം സ്പെഷ്യൽ കട്ട് ഔട്ട് ആരാധകർ ഉയർത്തിയത് വലിയ ആഘോഷമായാണ്. അതിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറൽ ആണ്.

കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി നിർമ്മിച്ച ഈ ചിത്രം സംവിധാനം ചെയ്തത് എം പദ്മകുമാറും രചിച്ചത് ശങ്കർ രാമകൃഷ്ണനും ആണ്. മമ്മൂട്ടിക്കൊപ്പം ഉണ്ണി മുകുന്ദൻ, മാസ്റ്റർ അച്യുതൻ, പ്രാചി ടെഹ്‌ലൻ, തരുൺ അറോറ, സിദ്ദിഖ്, സുദേവ് നായർ, അനു സിതാര, കനിഹ, ഇനിയ, മണിക്കുട്ടൻ, മണികണ്ഠൻ ആചാരി, കവിയൂർ പൊന്നമ്മ, സുനിൽ സുഗത, ഇടവേള ബാബു, ജയൻ ചേർത്തല, സുരേഷ് കൃഷ്ണ തുടങ്ങിയ ഒട്ടേറെ താരങ്ങൾ ഈ ചിത്രത്തിൽ അഭിനയിക്കുന്നുണ്ട്. എം ജയചന്ദ്രൻ സംഗീതം ഒരുക്കിയ ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് മനോജ് പിള്ളയും വി എഫ് എക്സ് കൈകാര്യം ചെയ്തത് കമല കണ്ണനും ആണ്. മലയാളം, തമിഴ്, തെലുങ്ക്, ഹിന്ദി ഭാഷകളിൽ ആയാണ് ഈ ചിത്രം എത്തുന്നത്.