വമ്പൻ റിലീസുകൾക്കിടയിലും മികച്ച കളക്ഷനുമായി ആന അലറലോടലറൽ

വിനീത് ശ്രീനിവാസൻ നായകനായ ആന അലറലോടലറൽ മികച്ച അഭിപ്രായം നേടി ബോക്സ് ഓഫീസിൽ മുന്നേറുകയാണ്. പ്രേക്ഷകരെ പൊട്ടിച്ചിരിപ്പിക്കുന്ന ഈ ചിത്രം വെക്കേഷൻ കഴിയുന്നതോടെ ഹിറ്റ് ചിത്രങ്ങളുടെ പട്ടികയിൽ ഇടം നേടും എന്നാണ് ഇപ്പോഴത്തെ ബോക്സ് ഓഫീസ് റിപ്പോർട്ടുകൾ സൂചിപ്പിക്കുന്നത്. നവാഗതനായ ദിലീപ് മേനോൻ സംവിധാനം ചെയ്ത ഈ ചിത്രം രചിച്ചിരിക്കുന്നതു ശരത് ബാലൻ ആണ്. താരതമ്യേന ചെറിയ ബഡ്ജറ്റിൽ ഒരുക്കിയ ഈ ചിത്രം ആദ്യത്തെ നാല് ദിവസം കൊണ്ട് വളരെ ഉയർന്ന കളക്ഷൻ നേടിയതായാണ് റിപ്പോർട്ടുകൾ സൂചിപ്പിക്കുന്നത്. കുടുംബ പ്രേക്ഷകരാണ് ഈ ചിത്രം കാണാൻ അധികവും എത്തുന്നത്, ക്രിസ്മസ് വെക്കേഷൻ കഴിയുന്നത് വരെയും ചിത്രത്തിന് മികച്ച കളക്ഷനിൽ തന്നെ തുടരാനാകും എന്നതിന്റെ സൂചനയാണ് ഇത്.

അനു സിതാര നായികയായി എത്തിയിരിക്കുന്ന ഈ ചിത്രത്തിൽ ഒരു ആനയും പ്രധാന കഥാപാത്രം ആയി എത്തിയിരിക്കുന്നു. പോയട്രി ഫിലിമ്സിന്റെ ബാനറിൽ സിബി തോട്ടുപുറം, നാവിസ് സേവ്യർ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിൽ വേലായുധൻ എന്ന കഥാപാത്രത്തെ അവതരിപ്പിച്ച സുരാജ് വെഞ്ഞാറമൂട് ഗംഭീര പ്രകടനമാണ് കാഴ്ച വെച്ചിരിക്കുന്നത് . ഇവർക്ക് പുറമെ ഹാരിഷ് കണാരൻ, മാമുക്കോയ, ഇന്നസെന്റ്, ധർമജൻ, ബിജു കുട്ടൻ, വിജയരാഘവന്‍, വിശാഖ് നായര്‍, തെസ്നി ഖാൻ എന്നിവരും മികച്ച പ്രകടനം ആണ് കാഴ്ച വെച്ചത്.

ആക്ഷേപ ഹാസ്യത്തിന്റെ മേമ്പൊടി ചാലിച്ചാണ് ഈ ചിത്രം ഒരുക്കിയിരിക്കുന്നത്. പ്രേക്ഷകനെ ചിരിപ്പിക്കുകയും ആവേശം കൊള്ളിക്കുകയും ചെയ്യാൻ ഈ ചിത്രത്തിന് കഴിഞ്ഞിട്ടുണ്ട് എന്നതാണ് കുടുംബ പ്രേക്ഷകർ ഈ ചിത്രത്തെ സ്വീകരിക്കാനുള്ള കാരണം. ദീപു എസ് ഉണ്ണി ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം പകർന്നിരിക്കുന്നത് ഷാൻ റഹ്മാൻ ആണ്. വരും ദിവസങ്ങളിലെ ഈ ചിത്രത്തിന്റെ ബോക്സ് ഓഫീസ് പ്രകടനം എങ്ങനെയായിരിക്കും എന്നത് ചിത്രത്തിന്റെ ഭാവി തീരുമാനിക്കും എന്നുറപ്പാണ്.