കാന്താരയുടെ തുടർച്ചയല്ല കാന്താര 2; കൂടുതൽ വിവരങ്ങളിതാ

കഴിഞ്ഞ വർഷം റിലീസ് ചെയ്ത് ഇന്ത്യൻ മുഴുവൻ ചർച്ചയായി മാറിയ പാൻ ഇന്ത്യൻ ഹിറ്റാണ് കന്നഡ ചിത്രമായ കാന്താര. റിഷാബ് ഷെട്ടി രചനയും സംവിധാനവും നിർവഹിച്ചു നായകനായി അഭിനയിച്ച ഈ ചിത്രം നിർമ്മിച്ചത് ഹോംബാലെ ഫിലിംസ് ആണ്. ഇപ്പോഴിതാ ഈ ചിത്രത്തിന്റെ രണ്ടാം ഭാഗം വരാൻ പോവുകയാണെന്ന വാർത്ത നിർമ്മാതാവ് വിജയ് കിരാഗന്ദുർ സ്ഥിരീകരിച്ചു കഴിഞ്ഞു. അതിനൊപ്പം തന്നെ ഈ ചിത്രത്തെ കുറിച്ചുള്ള കൂടുതൽ വിവരങ്ങളും അദ്ദേഹം വെളിപ്പെടുത്തി. ഹോളിവുഡ് മീഡിയയുമായി സംവദിക്കവേയാണ് അദ്ദേഹം ഈ കാര്യങ്ങൾ വെളിപ്പെടുത്തിയത്. കാന്താരയുടെ രണ്ടാം ഭാഗം അതിന്റെ പ്രീക്വൽ ആയാണ് ഒരുക്കുക എന്നാണ് അദ്ദേഹം ആദ്യം വെളിപ്പെടുത്തിയത്. കാന്താരയിൽ കാണിച്ച കഥയുടെ ആദ്യ ഭാഗം പോലെയാണ് കാന്താര 2 ഇൽ കഥ പറയുക എന്നും, റിഷാബ് ഷെട്ടി അതിന്റെ രചന ആരംഭിച്ചു കഴിഞ്ഞു എന്നും അദ്ദേഹം പറയുന്നു.

അതിനായി കൂടുതൽ റിസർച് നടത്താൻ കർണാടകയിലെ വനങ്ങളിലേക്ക് തന്റെ സഹായികളുമായി അദ്ദേഹം പോയിരിക്കുകയാണെന്നും വിജയ് കിരാഗന്ദുർ പറയുന്നു. ചിത്രത്തിലെ ഒരു ഭാഗം മഴക്കാലത്ത് ചിത്രീകരിക്കേണ്ടതായതിനാൽ ഈ വർഷം ജൂൺ മാസത്തിൽ കാന്താര 2 ആരംഭിക്കുമെന്നും, അടുത്ത വർഷം ഏപ്രിൽ/മെയ് സമയത്ത് ചിത്രം റിലീസ് ചെയ്യാനാണ് പ്ലാനെന്നും അവർ വിശദീകരിച്ചു. ആദ്യ ഭാഗത്തേക്കാൾ കൂടുതൽ വലിയ കാൻവാസിൽ ആയിരിക്കും കാന്താര 2 ഒരുക്കുക എന്നും അദ്ദേഹം കൂട്ടിച്ചേർത്തു. കാന്താരയുടെ മഹാവിജയം വലിയ പ്രതീക്ഷയാണ് പ്രേക്ഷകരിൽ ഉണ്ടാക്കിയിരിക്കുന്നതെന്നും, അത്കൊണ്ട് തന്നെ കൂടുതൽ ആഴമുള്ള കഥയും കഥാപാത്രങ്ങളും വലിയ കാൻവാസിലൂടെ പ്രേക്ഷകരുടെ മുന്നിലെത്തിക്കാനാണ് ശ്രമമെന്നും അദ്ദേഹം സൂചിപ്പിച്ചു.