മോഹൻലാൽ ചിത്രവുമായി ഹോളിവുഡ് നിർമ്മാതാവ്; ഒരുങ്ങുന്നത് വമ്പൻ ചിത്രം

മലയാളത്തിന്റെ മഹാനടൻ മോഹൻലാൽ നായകനായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് വൃഷഭ. ഇരുനൂറ് കോടി രൂപ ബഡ്ജറ്റിൽ പാൻ ഇന്ത്യൻ ചിത്രമായി ഒരുങ്ങുന്ന വൃഷഭ ഒരുക്കുന്നത് പ്രശസ്ത കന്നഡ സംവിധായകൻ നന്ദകിഷോറാണ്. മലയാളം, തെലുങ്ക്, കന്നഡ, ഹിന്ദി, തമിഴ് ഭാഷകളിലായി ഒരുങ്ങുന്ന ഈ ചിത്രത്തിന്റെ ഷൂട്ടിംഗ് ഇപ്പോൾ പുരോഗമിക്കുകയാണ്. എവിഎസ് സ്റ്റുഡിയോസ്, ഫസ്റ്റ് സ്റ്റെപ്പ് മൂവീസ്, ബാലാജി ടെലിഫിലിംസ്, കണക്റ്റ് മീഡിയ എന്നീ ബാനറുകലില്‍ അഭിഷേക് വ്യാസ്, വിശാല്‍ ഗുര്‍നാനി, ജൂഹി പരേഖ് മെഹ്ത, ശ്യാം സുന്ദര്‍, ഏക്ത കപൂര്‍, ശോഭ കപൂര്‍, വരുണ്‍ മാതൂര്‍ എന്നിവര്‍ ചേർന്ന് നിർമ്മിക്കുന്ന ഈ ചിത്രത്തിലേക്ക് ഇപ്പോഴിതാ ഒരു ഹോളിവുഡ് ബന്ധവും എത്തിക്കഴിഞ്ഞു.

ഓസ്കാർ അവാർഡ് നേടിയ മൂൺ ലൈറ്റ് ഉൾപ്പെടെ ഒട്ടേറെ ഹോളിവുഡ് വമ്പൻ ചിത്രങ്ങളിൽ നിർമ്മാതാവായും സഹനിർമ്മാതാവായും പ്രവർത്തിച്ചിട്ടുള്ള നിക്ക് തുർലോ ആണ് ഈ മോഹൻലാൽ ചിത്രത്തിന്റെ നിർമ്മാതാവായി ഇപ്പോൾ ചേർന്നിരിക്കുന്നത്. റോഷന്‍ മെക, ഷനയ കപൂര്‍, സഹ്‍റ ഖാന്‍, രാഗിണി ദ്വിവേദി, ശ്രീകാന്ത് മെക തുടങ്ങിയവരാണ് ഈ ചിത്രത്തിലെ മറ്റ് കഥാപാത്രങ്ങൾക്ക് ജീവൻ പകരുന്നത്. ദേവി ശ്രീ പ്രസാദ് സംഗീതമൊരുക്കുന്ന വൃഷഭ തലമുറകളിലൂടെ കഥ പറയുന്ന ഒരു എപിക് ആക്ഷന്‍ എന്‍റര്‍ടെയ്നര്‍ ആയാണ് ഒരുക്കുന്നത്. അടുത്ത വർഷം ഈ ചിത്രം പ്രേക്ഷകരുടെ മുന്നിലെത്തും. ഈ ചിത്രത്തിന്റെ സെറ്റിന്റെ വിവരങ്ങൾ പങ്ക് വെക്കുന്ന ഒരു വീഡിയോയും അണിയറ പ്രവർത്തകർ പുറത്തു വിട്ടിട്ടുണ്ട്.