ഹേ ജൂഡ് ട്രൈലെർ ശ്രദ്ധ നേടുന്നു; ചിത്രം ജനുവരി മൂന്നാം വാരം റിലീസ്..!

യുവ താരം നിവിൻ പോളിയെ നായകനാക്കി പ്രശസ്ത സംവിധായകൻ ശ്യാമ പ്രസാദ് ഒരുക്കിയ ചിത്രമാണ് ഹേ ജൂഡ്. ഒരു റൊമാന്റിക് മ്യൂസിക്കൽ കോമഡി ആയി ഒരുക്കിയിരിക്കുന്ന ഈ ചിത്രം ജനുവരി മൂന്നാം വാരം കേരളത്തിലെ തീയേറ്ററുകളിൽ എത്തുമെന്നാണ് ഇപ്പോൾ ലഭിക്കുന്ന സൂചനകൾ പറയുന്നത്. കുറച്ചു ദിവസം മുൻപ് റിലീസ് ചെയ്ത ഈ ചിത്രത്തിന്റെ ട്രെയിലറിന് മികച്ച പ്രതികരണം ആണ് ആരാധകരുടെ ഇടയിൽ നിന്നും സിനിമാ പ്രേമികളുടെ ഇടയിൽ നിന്നും ലഭിക്കുന്നത്. നിവിൻ പോളിയുടെ അഭിനയ ജീവിതത്തിലെ ഏറ്റവും വ്യത്യസ്തമായ ഒരു കഥാപാത്രം ആയിരിക്കും ഈ ചിത്രത്തിലെ ജൂഡ് എന്നാണ് ട്രൈലെർ നൽകുന്ന സൂചന. നിവിൻ പോളി അഭിനയിച്ച മൂന്നാമത്തെ ശ്യാമ പ്രസാദ് ചിത്രമാണ് ഹേ ജൂഡ്. ഇതിനു മുൻപേ ഇവിടെ, ഇംഗ്ലീഷ് എന്നീ ശ്യാമ പ്രസാദ് ചിത്രങ്ങളിൽ നിവിൻ പോളി അഭിനയിച്ചിട്ടുണ്ട്.

തെന്നിന്ത്യൻ താര സുന്ദരി തൃഷ ആദ്യമായി മലയാളത്തിൽ അഭിനയിക്കുന്ന ചിത്രം എന്ന പ്രത്യേകത കൂടിയുണ്ട് ഹേ ജൂഡിന്. ഇവരെ കൂടാതെ സിദ്ദിഖ് ഈ ചിത്രത്തിൽ ഒരു പ്രധാന വേഷം അഭിനയിക്കുന്നുണ്ട്. ഔസേപ്പച്ചൻ, ഗോപി സുന്ദർ, രാഹുൽ രാജ്, എം ജയചന്ദ്രൻ എന്നെ നാല് സംഗീത സംവിധായകൻ ഈ ചിത്രത്തിന്റെ ഭാഗമാണ് എന്നും റിപ്പോർട്ടുകൾ വന്നിരുന്നു. ഇർ നാല് പേരും ഈ ചിത്രത്തിന് വേണ്ടി ഗാനങ്ങൾ ഒരുക്കിയിട്ടുണ്ട് എന്നാണ് സൂചന. അത്‌പോലെ ഈ ചിത്രത്തിന്റെ പശ്ചാത്തല സംഗീതം ഒരുക്കിയത് ഔസേപ്പച്ചൻ ആണ്. ഗോവയിലാണ് ഹേ ജൂഡിന്റെ കൂടുതൽ ഭാഗവും ചിത്രീകരിച്ചത്. ഈ ചിത്രത്തിനായി നിവിൻ തന്റെ ശരീര ഭാരം വളരെയേറെ വർധിപ്പിച്ചിരുന്നു. നീന കുറുപ്പ്, വിജയ് മേനോൻ, അജു വർഗീസ് എന്നിവരും ഈ ചിത്രത്തിന്റെ താര നിരയുടെ ഭാഗം ആണ്. അനിൽ കുമാർ നിർമ്മിച്ച ഈ ചിത്രത്തിന് ദൃശ്യങ്ങൾ ഒരുക്കിയത് ഗിരീഷ് ഗംഗാധരൻ ആണ്.