മികച്ച പ്രകടനങ്ങളുമായി ഹേ ജൂഡ് വരുന്നു..!

യുവ താരം നിവിൻ പോളിയെ നായകനാക്കി പ്രശസ്ത സംവിധായകൻ ശ്യാമ പ്രസാദ് ഒരുക്കിയ ഹേ ജൂഡ് എന്ന ചിത്രം ഫെബ്രുവരി രണ്ടു മുതൽ പ്രദർശനം ആരംഭിക്കും. ഈ ചിത്രത്തിന്റെ ഓഡിയോ ലോഞ്ച് രണ്ടു ദിവസം മുൻപ് കൊച്ചിയിൽ വെച്ച് നടന്നിരുന്നു. ഒരു റൊമാന്റിക് മ്യൂസിക്കൽ കോമഡി ആയി ഒരുക്കിയിരിക്കുന്ന ഈ ചിത്രം ഇപ്പോൾ തന്നെ മികച്ച പ്രതീക്ഷകൾ ആണ് പ്രേക്ഷകരുടെ ഇടയിൽ സൃഷ്ടിച്ചു കൊണ്ടിരിക്കുന്നത്. തെന്നിന്ത്യൻ താര സുന്ദരി ആയ തൃഷ ആദ്യമായി മലയാളത്തിൽ അഭിനയിച്ച ചിത്രമാണ് ഹേ ജൂഡ്. സിദ്ദിക്കും ഈ ചിത്രത്തിൽ വളരെ പ്രധാനപ്പെട്ട ഒരു വേഷം അഭിനയിക്കുന്നുണ്ട്. നിവിൻ പോളി, തൃഷ, സിദ്ദിഖ് എന്നിവരും മികച്ച പ്രകടനം ആയിരിക്കും ഈ ചിത്രത്തിന്റെ ഹൈലൈറ്റ് എന്നാണ് ഇപ്പോൾ ലഭിക്കുന്ന റിപ്പോർട്ടുകൾ പറയുന്നത്. നിവിൻ ജൂഡ് എന്ന കഥാപാത്രത്തെ അവതരിപ്പിക്കുമ്പോൾ തൃഷ ക്രിസ്റ്റൽ എന്ന കഥാപാത്രത്തെയാണ് ഈ ചിത്രത്തിൽ അവതരിപ്പിക്കുന്നത്.

കുറച്ചു ദിവസം മുൻപ് റിലീസ് ചെയ്ത ഈ ചിത്രത്തിന്റെ ട്രെയിലറിന് മികച്ച പ്രതികരണം ആണ് ആരാധകരുടെ ഇടയിൽ നിന്നും സിനിമാ പ്രേമികളുടെ ഇടയിൽ നിന്നും ലഭിച്ചിരുന്നത്. ഔസേപ്പച്ചൻ , ഗോപി സുന്ദർ, രാഹുൽ രാജ്, എം ജയചന്ദ്രൻ എന്നീ നാല് സംഗീത സംവിധായകർ ചേർന്നാണ് ഈ ചിത്രത്തിന് സംഗീതം ഒരുക്കിയിരിക്കുന്നത്. ഇവിടെ , ഇംഗ്ലീഷ് എന്നീ ചിത്രങ്ങൾക്ക് ശേഷം നിവിൻ പോളി -ശ്യാമ പ്രസാദ് ടീം ഒന്നിച്ച ഈ ചിത്രം അമ്പലക്കര ഗ്ലോബൽ ഫിലിംസിന്റെ ബാനറിൽ അനിൽകുമാർ ആണ് നിർമ്മിച്ചിരിക്കുന്നത്. ഇ ഫോർ എന്റർടൈൻമെന്റ് ഹേ ജൂഡ് കേരളത്തിൽ വിതരണം ചെയ്യും.