വലിയ പ്രതീക്ഷയിൽ പ്രേക്ഷകർ; ജോജു ജോർജിന്റെ ചോല നാളെ മുതൽ

പ്രശസ്ത താരം ജോജു ജോർജ് നായകനായി എത്തുന്ന പുതിയ ചിത്രമായ ചോല നാളെ മുതൽ കേരളത്തിലെ തീയേറ്ററുകളിൽ എത്തുകയാണ്. കേരളത്തിൽ മികച്ച റിലീസ് ലഭിച്ചിരിക്കുന്ന ഈ ചിത്രത്തിന്റെ തിയേറ്റർ ലിസ്റ്റ് ഇവിടെ ചേർക്കുന്നു. ദേശീയ- സംസ്ഥാന തലങ്ങളിലും അന്താരാഷ്ട്ര ചലച്ചിത്ര മേളകളിലും ശ്രദ്ധിക്കപ്പെട്ട ഈ ചിത്രം സംവിധാനം ചെയ്തത് പ്രശസ്ത സംവിധായകൻ ആയ സനൽ കുമാർ ശശിധരൻ ആണ്. ജോജുവും തമിഴിലെ പ്രശസ്ത സംവിധായകൻ കാർത്തിക് സുബ്ബരാജും ചേർന്നാണ് ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നത്. ഇതിനു ഒരു തമിഴ് പതിപ്പും ഉണ്ട്. അല്ലി എന്നാണ് ചോലയുടെ തമിഴ് പതിപ്പിന്റെ പേര്.

നിമിഷാ സജയൻ നായികാ വേഷത്തിൽ എത്തുന്ന ഈ ചിത്രത്തിൽ പുതുമുഖം അഖിൽ വിശ്വനാഥും പ്രധാന വേഷം ചെയ്യുന്നു. ഒരു റോഡ് ത്രില്ലെർ ശൈലിയിൽ ഒരുക്കിയിരിക്കുന്ന ഈ ചിത്രത്തിന്റെ ട്രൈലെർ മികച്ച പ്രേക്ഷക പ്രതികരണം നേടിയെടുത്തിരുന്നു. സാമൂഹിക പ്രസക്തിയുള്ള ഒരു വിഷയം കൂടിയാണ് ഈ ചിത്രം ചർച്ച ചെയ്യുന്നത് എന്നാണ് സൂചന. ജോജു ജോർജ്, നിമിഷാ സജയൻ എന്നിവരുടെ ഗംഭീര പ്രകടനം ഈ ചിത്രത്തിന്റെ ഹൈലൈറ്റ് ആണെന്നും റിപ്പോർട്ടുകൾ പറയുന്നു.

ഒഴിവു ദിവസത്തെ കളി, സെക്സി ദുർഗ എന്നീ ചിത്രങ്ങൾ ഒരുക്കി പ്രശംസ നേടിയ സംവിധായകൻ ആണ് സനൽ കുമാർ ശശിധരൻ. ഏതായാലും ജോസഫ്, പൊറിഞ്ചു മറിയം ജോസ് എന്നീ ചിത്രങ്ങൾക്ക് ശേഷം ജോജു ജോർജ് എന്ന നടൻ ഒരിക്കൽ കൂടി കയ്യടി നേടാൻ പോകുന്ന ചിത്രം ആയിരിക്കും ചോല എന്നാണ് ജോജു ആരാധകരുടേയും സിനിമാ പ്രേമികളുടേയും പ്രതീക്ഷ.