ജനപ്രിയ നായകനും ആക്ഷൻ കിങ്ങും ഇന്നെത്തുന്നു; ജാക്ക് ഡാനിയൽ തീയേറ്റർ ലിസ്റ്റ് ഇതാ..!

ജനപ്രിയ നായകൻ ദിലീപും തമിഴകത്തിന്റെ ആക്ഷൻ കിങ് അർജുനും ഒരുമിച്ചു അഭിനയിച്ച ജാക്ക് ഡാനിയൽ എന്ന മാസ്സ് ത്രില്ലർ ഇന്ന് റിലീസ് ചെയ്യുകയാണ്. കേരളത്തിൽ വമ്പൻ റിലീസ് ആണ് ഈ ചിത്രം നേടിയെടുത്തിരിക്കുന്നതു. തമീൻസ് ഫിലിമ്സിന്റെ ബാനറിൽ ഷിബു തമീൻസ് നിർമ്മിച്ചിരിക്കുന്ന ഈ ചിത്രത്തിന്റെ കേരളാ തീയേറ്റർ ലിസ്റ്റ് ഇവിടെ ചേർക്കുന്നു. അഞ്ജു കുര്യൻ നായികാ വേഷം ചെയ്തിരിക്കുന്ന ഈ ചിത്രം രചന നിർവഹിച്ചു സംവിധാനം ചെയ്തിരിക്കുന്നത് എസ് എൽ പുരം ജയസൂര്യ ആണ്. ദിലീപ് ചിത്രം സ്പീഡ് ട്രാക്ക്, മോഹൻലാൽ ചിത്രം ഏയ്ഞ്ചൽ ജോൺ എന്നിവ സംവിധാനം ചെയ്തിട്ടുള്ള ജയസൂര്യയുടെ മൂന്നാമത്തെ ചിത്രമാണ് ജാക്ക് ഡാനിയൽ.

ഈ ചിത്രത്തിന്റെ ട്രൈലെർ പ്രേക്ഷകർക്കിടയിൽ വലിയ സ്വീകാര്യത നേടിയെടുത്തിരുന്നു. ദേവൻ, സൈജു കുറുപ്പ്, അശോകൻ തുടങ്ങിയവരും അഭിനയിച്ചിരിക്കുന്ന ഈ ചിത്രത്തിന് വേണ്ടി സംഘട്ടനം ഒരുക്കിയത് ദേശീയ അവാർഡ് ജേതാവ് കൂടിയായ പീറ്റർ ഹെയ്‌ൻ ആണ്. ആക്ഷന് ഒപ്പം സസ്‌പെൻസും പ്രണയവും തമാശകളും എല്ലാം നിറഞ്ഞ ഒരു കംപ്ലീറ്റ് ഫാമിലി എന്റെർറ്റൈനെർ ആണ് ഈ ചിത്രം എന്നാണ് അണിയറ പ്രവർത്തകർ പറയുന്നത്. ശുഭരാത്രി എന്ന ചിത്രത്തിന് ശേഷം ഈ വർഷം എത്തുന്ന ദിലീപ് ചിത്രമാണ് ജാക്ക് ഡാനിയൽ. ക്ലീൻ യു സർട്ടിഫിക്കറ്റ് ലഭിച്ചിരിക്കുന്ന ഈ ചിത്രം ദിലീപ് ആരാധകർക്ക് ഒരു വിരുന്നു തന്നെയാവും എന്നാണ് ഇപ്പോൾ വരുന്ന റിപ്പോർട്ടുകൾ സൂചിപ്പിക്കുന്നതു. ഈ വർഷം സുഗീത് ഒരുക്കുന്ന മൈ സാന്റാ എന്ന ദിലീപ് ചിത്രവും ആരാധകർക്ക് മുന്നിൽ എത്തും. ക്രിസ്മസിന് ആണ് ആ ചിത്രം എത്തുക.