ബിഗ് ബ്രദറിലെ പുതിയ പോസ്റ്റർ; മാസ്സ് ലുക്കിൽ മോഹൻലാൽ

കംപ്ലീറ്റ് ആക്ടർ മോഹൻലാൽ നായകനായി എത്തുന്ന പുതിയ ചിത്രമായ ബിഗ് ബ്രദർ ജനുവരി 16 ന് ആണ് ആഗോള റിലീസ് ആയി എത്തുന്നത്. പ്രശസ്ത സംവിധായകൻ സിദ്ദിഖ് രചനയും സംവിധാനവും നിർവഹിച്ച ഈ ചിത്രത്തിന്റെ ട്രയ്ലർ, ഗാനങ്ങൾ എന്നിവ ഇപ്പോൾ തന്നെ സൂപ്പർ ഹിറ്റായി കഴിഞ്ഞു. ഇതിന്റെ പോസ്റ്ററുകളും വലിയ പ്രേക്ഷക ശ്രദ്ധയാണ് നേടുന്നത്. ഇപ്പോഴിതാ മോഹൻലാൽ പുറത്തു വിട്ട ഈ ചിത്രത്തിന്റെ പുതിയ പോസ്റ്റർ സോഷ്യൽ മീഡിയയിൽ വൈറൽ ആവുകയാണ്. മാസ്സ് ലുക്കിൽ മോഹൻലാലിന്റെ ഒരു ആക്ഷൻ സീൻ ആണ് ഈ പോസ്റ്ററിലൂടെ പ്രേക്ഷകർക്ക് മുന്നിൽ എത്തിയിരിക്കുന്നത്. തന്റെ പതിവ് ശൈലിയിൽ നിന്ന് മാറി ഒരു ആക്ഷൻ സിനിമ ആയാണ് താൻ ബിഗ് ബ്രദർ ഒരുക്കിയിരിക്കുന്നത് എന്ന് സംവിധായകൻ സിദ്ദിഖ് പറഞ്ഞിരുന്നു.

എല്ലാത്തരം പ്രേക്ഷകരേയും ആകർഷിക്കുന്ന ഒരു മാസ്സ് എന്റെർറ്റൈനെർ ആയി ഒരുക്കിയിരിക്കുന്ന ഈ ചിത്രം ഏകദേശം മുപ്പതു കോടിയോളം രൂപ ചിലവിൽ ആണ് നിർമ്മിച്ചിരിക്കുന്നത്. സിദ്ദിഖ് നിർമ്മാണ പങ്കാളി കൂടിയായ ഈ ചിത്രത്തിന് സംഗീതം ഒരുക്കിയിരിക്കുന്നത് ദീപക് ദേവ് ആണ്. ഈ കഴിഞ്ഞ ഡിസംബർ 26 നു ആയിരുന്നു ഈ ചിത്രത്തിന്റെ ഓഡിയോ ലോഞ്ച്. ബോളിവുഡ് താരം അർബാസ് ഖാൻ ആദ്യമായി മലയാളത്തിൽ എത്തുന്ന ഈ ചിത്രത്തിൽ അനൂപ് മേനോൻ, വിഷ്ണു ഉണ്ണികൃഷ്ണൻ, ടിനി ടോം, ഇർഷാദ്, ജനാർദ്ദനൻ, സർജാണോ ഖാലിദ്, മിർണ്ണ മേനോൻ എന്നിവരും അഭിനയിക്കുന്നുണ്ട്. ജിത്തു ദാമോദർ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തത് ഗൗരി ശങ്കർ ആണ്. സ്റ്റണ്ട് സിൽവ, സുപ്രീം സുന്ദർ എന്നിവർ ചേർന്ന് ആണ് ഇതിനു വേണ്ടി ആക്ഷൻ രംഗങ്ങൾ ഒരുക്കിയിരിക്കുന്നത്.