തകർപ്പൻ ഫസ്റ്റ് ലുക്ക് പോസ്റ്ററുമായി എബ്രിഡ് ഷൈന്റെ ദി കുങ്ഫു മാസ്റ്റർ

1983, ആക്ഷൻ ഹീറോ ബിജു, പൂമരം എന്നീ ചിത്രങ്ങൾക്ക് ശേഷം പ്രശസ്ത സംവിധായൻ എബ്രിഡ് ഷൈൻ ഒരിക്കൽ കൂടി പ്രേക്ഷകരുടെ മുന്നിലേക്ക് തന്റെ ചിത്രവുമായി എത്തുകയാണ്. ഇത്തവണ മലയാള സിനിമ ഇതുവരെ കാണാത്ത തരത്തിലുള്ള ഒരു ആക്ഷൻ ചിത്രവുമായാണ് അദ്ദേഹം എത്തുന്നത്. ദി കുങ്ഫു മാസ്റ്റർ എന്ന പേരിട്ടിരിക്കുന്ന ഈ ആക്ഷൻ ചിത്രം പേര് സചിപ്പിക്കുന്നത് പോലെ തന്നെ കുങ്ഫു എന്ന മാർഷ്യൽ ആർട്സ് അടിസ്ഥാനപ്പെടുത്തി കഥ പറയുന്ന ഒരു ചിത്രമാണ്. ഈ ചിത്രത്തിന്റെ തകർപ്പൻ ഫസ്റ്റ് ലുക്ക് പോസ്റ്റർ ഇന്ന് റിലീസ് ചെയ്തു കഴിഞ്ഞു. കിടിലൻ ആക്ഷൻ ചിത്രമായിരിക്കും ഇതെന്ന പ്രതീക്ഷ പ്രേക്ഷകർക്ക് പകർന്നു നൽകുന്ന തരത്തിൽ ആണ് ഈ പോസ്റ്റർ ഒരുക്കിയിരിക്കുന്നത്.

ഹിമാലയത്തിന്റെ താഴ്‌വരയിൽ ആയിരുന്നു ഈ ചിത്രത്തിന്റെ ചിത്രീകരണം പ്രധാനമായും നടന്നത്. എബ്രിഡ് ഷൈൻ ഒരുക്കിയ മൂന്നാമത്തെ ചിത്രമായ പൂമരത്തിലെ നായികാ വേഷം ചെയ്ത നീത പിള്ള ആണ് ഈ ചിത്രത്തിലെ നായികാ വേഷം ചെയ്യുന്നത്. പുതുമുഖമായ ജിജി സ്കറിയ ആണ് ഇതിലെ നായകൻ ആയി എത്തുന്നത്. മേജർ രവിയുടെ മകൻ അർജുൻ ഛായാഗ്രഹണം നിർവഹിച്ച ഈ ചിത്രത്തിന്റെ എഡിറ്റിംഗ് നിർവഹിച്ചത് കെ ആർ മിഥുൻ ആണ്. ഫുൾ ഓൺ സിനിമാസിന്റെ ബാനറിൽ ഷിബു തെക്കുപുറം നിർമ്മിച്ചിരിക്കുന്ന ഈ ചിത്രം ബ്രൂസ് ലീ, ജാക്കി ചാൻ ചിത്രങ്ങളിൽ നിന്ന് പ്രചോദനം ഉൾക്കൊണ്ടാണ് ഒരുക്കിയിരിക്കുന്നത് എന്ന് എബ്രിഡ് ഷൈൻ പറയുന്നു. ഈ ചിത്രത്തിന് വേണ്ടി അഭിനേതാക്കൾ പ്രത്യേക കുങ്ഫു പരിശീലനം നേടിയിരുന്നു.