ഗംഭീര മേക് ഓവറുമായി ലെന; ആർട്ടിക്കിൾ 21 ഫസ്റ്റ് ലുക്ക് പോസ്റ്റർ എത്തി

പ്രശസ്ത മലയാള നടി ലെന നായികാ വേഷം ചെയ്യുന്ന ആർട്ടിക്കിൾ 21 എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് റിലീസ് ചെയ്തു. ഗംഭീര പ്രതികരണമാണ് സോഷ്യൽ മീഡിയയിൽ നിന്ന് ഈ ഫസ്റ്റ് ലുക്ക് പോസ്റ്റർ ഇപ്പോൾ നേടിക്കൊണ്ടിരിക്കുന്നത്. ലെനയുടെ ഞെട്ടിക്കുന്ന മേക് ഓവർ തന്നെയാണ് ഈ ഫസ്റ്റ് ലുക്ക് പോസ്റ്ററിന്റെ ഏറ്റവും വലിയ സവിശേഷത എന്ന് പറയേണ്ടി വരും. വളരെയധികം സാമൂഹിക പ്രസക്തമായ ഒരു വിഷയമാണ് ഈ ചിത്രം പറയാൻ പോകുന്നത് എന്നും ലെനയുടെ അഭിനയ ജീവിതത്തിലെ ഏറ്റവും മികച്ച വേഷങ്ങളിൽ ഒന്നാവും ഇതിലേതു എന്നുമുള്ള സൂചനയാണ് ഈ ഫസ്റ്റ് ലുക്ക് പോസ്റ്റർ സിനിമാ പ്രേമികൾക്ക് നൽകുന്നത്. ലെനിൻ ബാലകൃഷ്ണൻ രചന നിർവഹിച്ചു സംവിധാനം ചെയ്തിരിക്കുന്ന ഈ ചിത്രം ജോസെഫ് ധനൂപ്, പ്രസീന എന്നിവർ ചേർന്ന് വാക് വിത്ത് സിനിമ എന്ന ബാനറിലാണ് നിർമ്മിച്ചിരിക്കുന്നത്.

അഷ്‌കർ ക്യാമറ ചലിപ്പിച്ചിരിക്കുന്ന ഈ ചിത്രത്തിന് സംഗീത സംവിധാനം നിർവഹിച്ചിരിക്കുന്നതു ഗോപി സുന്ദറാണ്. സന്ദീപ് നന്ദകുമാറാണ് ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നതു. നിവിൻ പോളി, ടോവിനോ തോമസ്, ആന്റണി വർഗീസ്, പൃഥ്വിരാജ് സുകുമാരൻ, ജോജു ജോർജ്, അമൽ നീരദ്, ഗോപി സുന്ദർ, അജു വർഗീസ്, ഐശ്വര്യ ലക്ഷ്മി, ബിനീഷ് കോടിയേരി, സുധി കോപ്പ, ലിയോണ ലിഷോയ്, മധു സി നാരായണൻ, നിരഞ്ജന അനൂപ്, അനിൽ രാധാകൃഷ്ണൻ മേനോൻ, ലാൽ ജോസ്, രഞ്ജിത്ത്, സുരാജ് വെഞ്ഞാറമൂട് എന്നിവരുടെ ഒഫീഷ്യൽ ഫേസ്ബുക് പേജിലൂടെയാണ് ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് പുറത്തു വന്നത്.