പ്രതീക്ഷയോടെ പ്രേക്ഷകർ; സൗബിൻ ഷാഹിറിന്റെ അമ്പിളി നാളെ മുതൽ…!!

മലയാളി പ്രേക്ഷകരുടെ പ്രീയപ്പെട്ട നടൻ സൗബിൻ ഷാഹിർ നായകനായി എത്തുന്ന അമ്പിളി എന്ന ചിത്രം നാളെ മുതൽ കേരളത്തിലെ തീയേറ്ററുകളിൽ പ്രദർശനം ആരംഭിക്കുകയാണ്. കേരളത്തിൽ മികച്ച റിലീസ് ലഭിച്ചിരിക്കുന്ന ഈ ചിത്രത്തിന്റെ തിയേറ്റർ ലിസ്റ്റ് ഇവിടെ ചേർക്കുന്നു. ഇ ഫോർ എന്റെർറ്റൈന്മെന്റിന്റെ ബാനറിൽ സി വി സാരഥി, മുകേഷ് ആർ മെഹ്ത എന്നിവരും എ വി എ പ്രൊഡക്ഷൻസിന്റെ ബാനറിൽ എ വി അനൂപും ചേർന്ന് നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് ഗപ്പി എന്ന ചിത്രത്തിലൂടെ അരങ്ങേറ്റം കുറിച്ച ജോൺ പോൾ ജോർജ് ആണ്. ഈ ചിത്രം രചിച്ചിരിക്കുന്നതും സംവിധായകനായ ജോൺ പോൾ ജോർജ് തന്നെയാണ്. ഞാൻ ജാക്സൺ അല്ലടാ, ന്യൂട്ടൺ അല്ലടാ എന്ന് തുടങ്ങുന്ന രസകരമായ ഗാനത്തിന്റെ അകമ്പടിയോടെ വന്ന അമ്പിളിയുടെ ടീസർ സോഷ്യൽ മീഡിയയിൽ വമ്പൻ ഹിറ്റായി മാറിയിരുന്നു.

സൗബിൻ ഷാഹിറിന്റെ കിടിലൻ ഡാൻസ് ആയിരുന്നു ഈ ടീസറിന്റെ പ്രധാന ആകർഷണം. സൗബിൻ ഷാഹിറിനൊപ്പം നവീൻ നസിം, തൻവി റാം എന്നിവരും ഈ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു. പ്രശസ്ത നടിയും ഫഹദ് ഫാസിലിന്റെ ഭാര്യയുമായ നസ്രിയയുടെ സഹോദരനായ നവീൻ നസീമിന്റെ ആദ്യ ചിത്രമാണ് അമ്പിളി. വിഷ്ണു വിജയ് സംഗീത സംവിധാനം നിർവഹിച്ച ഈ ചിത്രത്തിന് ദൃശ്യങ്ങൾ ഒരുക്കിയത് ശരൺ വേലായുധനും ഈ ചിത്രം എഡിറ്റ് ചെയ്യുന്നത് കിരൺ ദാസും ആണ്. ഏതായാലും ടീസറും ഗാനങ്ങളും തന്ന വലിയ പ്രതീക്ഷകൾ പേറിയാണ് പ്രേക്ഷകർ ഈ ചിത്രം കാണാൻ നാളെ തീയേറ്ററുകളിലേക്കു പോവുക എന്നുറപ്പാണ്.