വമ്പൻ പ്രതീക്ഷകളോടെ വിജയ് സൂപ്പറും പൗർണ്ണമിയും നാളെ മുതൽ; തിയേറ്റർ ലിസ്റ്റ് ഇതാ..!

പ്രേക്ഷകർ ഏറെ പ്രതീക്ഷകളോടെ കാത്തിരിക്കുന്ന വിജയ് സൂപ്പറും പൗർണ്ണമിയും എന്ന ആസിഫ് അലി ചിത്രം നാളെ കേരളത്തിലെ തീയേറ്ററുകളിൽ പ്രദർശനം ആരംഭിക്കുകയാണ്. കേരളത്തിലെ 114 സ്‌ക്രീനുകളിൽ റിലീസ് ചെയ്യുന്ന ഈ ചിത്രം രചിച്ചു സംവിധാനം ചെയ്തത് ബൈസൈക്കിൾ തീവ്സ്, സൺ‌ഡേ ഹോളിഡേ എന്നീ ഹിറ്റ് ചിത്രങ്ങൾ നമ്മുക്ക് സമ്മാനിച്ച ജിസ് ജോയ് ആണ്. ആസിഫ് അലി- ജിസ് ജോയ് കൂട്ടുകെട്ട് ഒന്നിച്ച ഈ മൂന്നാമത്തെ ചിത്രത്തിലെ നായികാ വേഷം ചെയ്തിരിക്കുന്നത് ഇന്നത്തെ മലയാള സിനിമയിലെ ഭാഗ്യ നായികമാരിൽ ഒരാളായ ഐശ്വര്യ ലക്ഷ്മിയാണ്. ന്യൂ സൂര്യ ഫിലിമ്സിന്റെ ബാനറിൽ സുനിൽ എ കെ നിർമ്മിച്ച ഈ ചിത്രത്തിൽ ഇവരോടൊപ്പം വമ്പൻ താര നിരയാണ് അണിനിരക്കുന്നത്. ബാലു വർഗീസ്, അജു വർഗീസ്, ജോസഫ് അന്നക്കുട്ടി, രഞ്ജി പണിക്കർ, സിദ്ദിഖ്, ശാന്തി കൃഷ്ണ, ദേവൻ, കെ പി എ സി ലളിത എന്നിവരാണ് ഈ ചിത്രത്തിലെ മറ്റു പ്രധാന താരങ്ങൾ.

പ്രശസ്ത ക്യാമറാമാൻ റെനഡിവേ ഛായാഗ്രഹണം നിർവഹിച്ച ഈ ചിത്രത്തിന് വേണ്ടി സംഗീതം ഒരുക്കിയത് പ്രിൻസ് ജോർജ് ആണ്. ടീം ഫോർ മ്യൂസിക്സ് ആണ് വിജയ് സൂപ്പറും പൗർണ്ണമിക്കും വേണ്ടി പശ്ചാത്തല സംഗീതം നൽകിയിരിക്കുന്നത്. രതീഷ് രാജ് എഡിറ്റ് ചെയ്ത ഈ ചിത്രം ഒരു ഫീൽ ഗുഡ് ഫാമിലി കോമഡി എന്റെർറ്റൈനെർ ആയാണ് ഒരുക്കിയിരിക്കുന്നത്. ഇതിന്റെ നാല് ടീസറുകളും ട്രെയ്ലറും അതുപോലെ തന്നെ ഗാനങ്ങളും വമ്പൻ ജനശ്രദ്ധയാണ് ഇതിനോടകം നേടിയെടുത്തിരിക്കുന്നതു. ഒരുപക്ഷെ ഈ വർഷം പ്രേക്ഷകർ ഏറ്റവും കൂടുതൽ കാത്തിരിക്കുന്ന മലയാള ചിത്രങ്ങളിൽ ഒന്നാണ് ഇതെന്ന് നിസംശയം നമ്മുക്ക് പറയാൻ സാധിക്കും.