സ്റ്റൈലിഷ് ഗാംഗ്സ്റ്ററായി ദുൽഖർ സൽമാൻ; കിംഗ് ഓഫ് കൊത്ത സെക്കന്റ് ലുക്ക് കാണാം

മലയാളത്തിന്റെ യുവതാരം ദുൽഖർ സൽമാൻ നായകനായി അഭിനയിക്കുന്ന ഏറ്റവും പുതിയ മലയാള ചിത്രമാണ് കിംഗ് ഓഫ് കൊത്ത. മാസ്റ്റർ ഡയറക്ടർ ജോഷിയുടെ മകൻ അഭിലാഷ് ജോഷി ആദ്യമായി സംവിധാനം ചെയ്യുന്ന ഈ മാസ്സ് ആക്ഷൻ പീരീഡ് ചിത്രം രചിച്ചിരിക്കുന്നത് അഭിലാഷ് എൻ ചന്ദ്രനാണ്. ഇതിന്റെ ഫസ്റ്റ് ലുക്ക് പോസ്റ്റർ നേരത്തെ പുറത്ത് വരികയും സൂപ്പർ ഹിറ്റായി മാറുകയും ചെയ്തിരുന്നു. ഇപ്പോഴിതാ ദുൽഖർ സൽമാൻ സിനിമയിൽ വന്നിട്ട് 11 വർഷം പൂർത്തിയാക്കുന്ന ഈ ദിവസം ഈ ചിത്രത്തിന്റെ സെക്കന്റ് ലുക്ക് പോസ്റ്ററും പുറത്ത് വിട്ടിരിക്കുകയാണ് അണിയറ പ്രവർത്തകർ. ദുൽഖർ സൽമാൻ തന്നെ തന്റെ സ്വന്തം ബാനറായ വേഫെറർ ഫിലിംസിന്റെ ബാനറിൽ നിർമ്മിക്കുന്ന ഈ ചിത്രത്തിന്റെ സഹനിർമ്മാതാവായി സീ സ്റ്റുഡിയോസ് കൂടി മലയാളത്തിലെത്തുന്നുണ്ട്. ദുൽഖർ സൽമാന്റെ കരിയറിലെ തന്നെ ഏറ്റവും വലിയ മലയാള ചിത്രമായാണ് ഇത് ഒരുങ്ങുന്നത്. ഒരു സ്റ്റൈലിഷ് ഗാംഗ്സ്റ്ററായാണ് ദുൽഖർ ഇതിലെത്തുന്നത് എന്ന സൂചനയാണ് ഇപ്പോൾ വന്ന സെക്കന്റ് ലുക്ക് പോസ്റ്റർ തരുന്നത്.

ജോഷി സംവിധാനം ചെയ്ത സൂപ്പർഹിറ്റ് ചിത്രം പൊറിഞ്ചു മറിയം ജോസ് രചിച്ച ആളാണ് ഇതിന്റെ എഴുത്തുകാരനായ അഭിലാഷ് എൻ ചന്ദ്രൻ. ദുൽഖർ സൽമാൻ കൂടാതെ ഒരു വലിയ താരനിര അണിനിരക്കുന്ന ഈ ചിത്രത്തിൽ തമിഴിൽ നിന്നുള്ള താരങ്ങളും അഭിനയിക്കുന്നുണ്ട്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷയില്‍ മാസ് ഗ്യാങ്‍സ്റ്റര്‍ ചിത്രമായി ഒരുക്കുന്ന കിംഗ് ഓഫ് കൊത്തയിൽ അഭിനയിക്കുന്ന മറ്റ്‌ താരങ്ങൾ, പ്രസന്ന, ഐശ്വര്യ ലക്ഷ്മി, ഗോകുൽ സുരേഷ്, ശാന്തി കൃഷ്ണ, നൈല ഉഷ, ചെമ്പൻ വിനോദ്, സുധി കോപ്പ, റിതിക സിങ്, പ്രമോദ് വെളിയനാട്, കെ ജി എഫ് താരം ശരൺ എന്നിവരാണ്. നിമിഷ് രവി ക്യാമറ ചലിപ്പിക്കുന്ന ഈ ചിത്രത്തിന് സംഘട്ടനസംവിധാനം ചെയ്യുന്നത് രാജശേഖർ, എഡിറ്റ് ചെയ്യുന്നത് ശ്യാം ശശിധരൻ, സംഗീതമൊരുക്കുന്നത് ജേക്സ് ബിജോയ്, ഷാൻ റഹ്മാൻ എന്നിവരാണ്. ഓണം റിലീസായി കിംഗ് ഓഫ് കൊത്ത പ്രേക്ഷകരുടെ മുന്നിലെത്തും.