കണ്ണിലെ തീയും മുഖത്തെ ശൗര്യവും ഇത് മലയാള സിനിമയുടെ ഭീഷ്മാചാര്യൻ !! മെഗാസ്റ്റാറും അമൽ നീരദും ഒന്നിക്കുന്ന പുതിയ ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്ത് !!

കോവിഡ് പ്രതിസന്ധി മൂലമുണ്ടായ നീണ്ട ഇടവേളയ്ക്കു ശേഷം മെഗാ സ്റ്റാർ മമ്മൂട്ടി അഭിനയിക്കുന്ന പുതിയ ചിത്രം പ്രഖ്യാപിച്ചു. അമൽ നീരദ് സംവിധാനം ചെയ്യാൻ പോകുന്ന ഈ ചിത്രത്തിന്റെ പേര് ഭീഷ്മ പർവ്വം എന്നാണ്. ഇന്ന് വൈകുന്നേരം മമ്മൂട്ടി തന്നെയാണ് ചിത്രത്തിന്റെ ഫസ്റ്റ് ലുക്ക് പോസ്റ്റർ തന്റെ സോഷ്യൽ മീഡിയ പേജിലൂടെ പങ്കു വെച്ചത്. നീട്ടി വളർത്തിയ മുടിയും, കട്ടി താടിയും, പിരിച്ചു വെച്ച മീശയുമായി കിടിലൻ ലുക്കിലാണ് ഈ പോസ്റ്ററിൽ മമ്മൂട്ടിയെ കാണാൻ സാധിക്കുക. അമൽ നീരദ് തന്നെയാണ്, അമൽ നീരദ് പ്രൊഡക്ഷൻസ് എന്ന ബാനറിൽ ഈ ചിത്രം നിർമ്മിക്കാൻ പോകുന്നത്. അമൽ നീരദിന്റെ ആദ്യ ചിത്രമായ ബിഗ് ബിയുടെ രണ്ടാം ഭാഗമായ ബിലാൽ ആയിരുന്നു അമൽ- മമ്മൂട്ടി കൂട്ടുകെട്ടിൽ ഉടനെ ഒരുങ്ങാൻ ഇരുന്നത് എങ്കിലും കോവിഡ് പ്രതിസന്ധി മൂലം ആ ചിത്രം മാറ്റി വെക്കുകയായിരുന്നു. ഭീഷ്മ പർവത്തിന്റെ റിലീസിന് ശേഷം ഈ വർഷം അവസാനം ബിലാൽ തുടങ്ങുമെന്നാണ് പ്രതീക്ഷിക്കപ്പെടുന്നത്. വിദേശ രാജ്യങ്ങളിലും ഷൂട്ടിംഗ് ഉള്ളത് കൊണ്ടാണ് ബിലാൽ തൽക്കാലത്തേക്ക് മാറ്റി വെച്ചത് എന്നാണ് അറിയുന്നത്.

ഭീഷ്മ പർവ്വം എന്ന ഈ പുതിയ ചിത്രത്തിൽ മമ്മൂട്ടിക്കൊപ്പം സൗബിൻ ഷാഹിർ, ശ്രീനാഥ് ഭാസി എന്നിവരും ഉണ്ടാകുമെന്നുള്ള റിപ്പോർട്ടുകൾ നേരത്തെ വന്നിരുന്നു. ചിത്രത്തെ കുറിച്ചുള്ള കൂടുതൽ വിവരങ്ങൾ വഴിയേ പുറത്തു വരുമെന്നാണ് പ്രതീക്ഷിക്കപ്പെടുന്നത്. ഏതായാലും ഈ ചിത്രത്തിന്റെ കിടിലൻ ഫസ്റ്റ് ലുക്ക് പോസ്റ്റർ ഇപ്പോൾ സോഷ്യൽ മീഡിയയിൽ വൈറൽ ആയിക്കഴിഞ്ഞു. വലിയ ആവേശത്തോടെയാണ് ഇപ്പോൾ മമ്മൂട്ടി ആരാധകരും സിനിമാ പ്രേമികളും ഈ ചിത്രത്തിനായി കാത്തിരിക്കുന്നത്. ഈ മാസം രണ്ടാം വാരത്തിൽ ആവും ഈ ചിത്രത്തിന്റെ ഷൂട്ടിംഗ് ആരംഭിക്കുക എന്നാണറിവ്.