ചിരിപ്പിക്കാൻ കക്ഷിയും വക്കീലും ഇന്ന് എത്തുന്നു; കക്ഷി അമ്മിണിപ്പിള്ള തിയേറ്റർ ലിസ്റ്റ് ഇതാ..!

യുവ താരം ആസിഫ് അലി നായകനായി എത്തുന്ന പുതിയ ചിത്രമായ കക്ഷി അമ്മിണി പിള്ള ഇന്ന് മുതൽ പ്രദർശനം ആരംഭിക്കുകയാണ്. കേരളത്തിൽ മികച്ച റിലീസ് ലഭിച്ചിരിക്കുന്ന ഈ ചിത്രത്തിന്റെ തീയേറ്റർ ലിസ്റ്റ് എത്തി കഴിഞ്ഞു. ഈ ചിത്രത്തിന്റെ പോസ്റ്ററുകളും ഇതിലെ ഗാനങ്ങളും ഇപ്പോൾ തന്നെ സോഷ്യൽ മീഡിയയിൽ വൈറൽ ആണ്. നവാഗതനായ ദിന്‍ജിത്ത് അയ്യത്താന്‍ സംവിധാനം ചെയ്ത ഈ ചിത്രം രചിച്ചിരിക്കുന്നത് സനിലേഷ് ശിവൻ ആണ്. സാറ ഫിലിംസിന്റെ ബാനറില്‍ റിജു രാജൻ നിർമ്മിച്ചിരിക്കുന്ന ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. ഒരു കോമഡി ഡ്രാമ അല്ലെങ്കിൽ കോർട്ട് റൂം ഡ്രാമ ആയിട്ടാണ് ഈ ചിത്രം ഒരുക്കിയിരിക്കുന്നത് എന്നാണ് സൂചന. ഏതായാലും പ്രേക്ഷകർക്ക് ഒരു ചിരി വിരുന്നു തന്നെയായിരിക്കും ഈ ചിത്രം നൽകുക എന്ന് ഇതിന്റെ താര നിര സൂചിപ്പിക്കുന്നു.

ആസിഫ് അലി പ്രദീപൻ മാഞ്ചോടി എന്ന വക്കീൽ ആയി അഭിനയിക്കുന്ന ഈ ചിത്രത്തിൽ അഹമ്മദ് സിദ്ദിഖി, ബേസിൽ ജോസഫ്, വിജയരാഘവൻ, നിർമൽ പാലാഴി, സുധീഷ്, ശ്രീകാന്ത് മുരളി, ലുക്മാൻ, ഹരീഷ് കണാരൻ, ബാബു സ്വാമി, മാമൂക്കോയ, ഉണ്ണിരാജ, സുധീർ പറവൂർ, ശിവദാസൻ, ഷിബില, സരസ ബാലുശേരി എന്നിവരും പ്രധാന വേഷങ്ങൾ ചെയ്യുന്നു. സൂരജ് ഇ എസ് എഡിറ്റ് ചെയ്തിരിക്കുന്ന ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് ബാഹുൽ രമേശ് ആണ്. അരുൺ മുരളീധരൻ, സാമുവൽ എബി എന്നിവർ ഗാനങ്ങൾക്ക് ഈണം പകർന്നപ്പോൾ ഈ ചിത്രത്തിന്റെ പശ്ചാത്തല സംഗീതം ഒരുക്കിയത് ജേക്സ് ബിജോയ് ആണ്.