മോഹൻലാലിന് എതിരെയുള്ള ബോഡി ഷെയിമിങ്ങിനെ വിമർശിച്ചു ഹരീഷ് പേരാടി..!

കംപ്ലീറ്റ് ആക്ടർ മോഹൻലാൽ നായകനായി എത്തുന്ന ബ്രഹ്മാണ്ഡ ചിത്രം മരക്കാർ അറബിക്കടലിന്റെ സിംഹം അടുത്ത വർഷം മാർച്ചിൽ ആണ് റിലീസ് ചെയ്യാൻ പോകുന്നത്. പ്രിയദർശൻ ഒരുക്കിയ ഈ ചിത്രം മലയാള സിനിമയിലെ എക്കാലത്തെയും ഏറ്റവും വലിയ പ്രോജക്ട് കൂടിയാണ്. എന്നാൽ മരക്കാർ എന്ന ചിത്രത്തിലെ മോഹൻലാലിന്റെ കുറച്ചു സ്റ്റില്ലുകൾ വന്നപ്പോൾ സോഷ്യൽ മീഡിയയിൽ ഉള്ള മോഹൻലാൽ വിരോധികൾ അത് വെച് അദ്ദേഹത്തിന് എതിരെ ബോഡി ഷെയിമിങ് നടത്തുകയും അതിനു എതിരെ സിനിമാ പ്രേമികളുടെ വലിയ പ്രതിഷേധം ഉടലെടുക്കുകയും ചെയ്തിരുന്നു. ഇന്ത്യൻ സിനിമയുടെ ചരിത്രത്തിലെ തന്നെ ഏറ്റവും മികച്ച നടന്മാരിൽ ഒരാളും മലയാള സിനിമയിലെ എക്കാലത്തെയും ഏറ്റവും വലിയ താരവുമായ മോഹൻലാലിനെ ഇത്തരത്തിൽ വിലയിരുത്തുന്നത് തെറ്റാണെന്ന് ഏവരും ഒരേ സ്വരത്തിൽ പറയുന്നു. ഇപ്പോഴിതാ അത്തരത്തിൽ ബോഡി ഷെയിമിങ് നടത്തിയവർക്കെതിരെ പ്രതികരിച്ചു കൊണ്ട് രംഗത്ത് വന്നിരിക്കുന്നത് പ്രശസ്‌ത നടനായ ഹരീഷ് പേരാടി ആണ്.

അദ്ദേഹത്തിന്റെ വാക്കുകൾ ഇങ്ങനെ, “ഈ മനുഷ്യനെ ബോഡി ഷെയിമിംങ്ങ് നടത്തിയവരോടാണ് ഞാൻ സംസാരിക്കുന്നത്. ഞാൻ കുഞ്ഞാലി മരക്കാറുടെ മലയാളവും തമിഴും ഡബ്ബിംഗ് പൂർത്തിയാക്കി… ഞാനും ഈ മഹാനടനും തമ്മിൽ അതിവൈകാരികമായ ഒരു സീനുണ്ട്. അതിൽ തന്റെ മുഖത്തിന്റെ ഒരു ഭാഗം മാത്രം തന്ന് ഈ മനുഷ്യന്റെ ഒരു അഭിനയ മുഹൂർത്തമുണ്ട്… അതിൽ കുഞ്ഞാലിയുടെ ഹൃദയമായിരുന്നു അവിടെ മുഴുവൻ പ്രകാശിച്ചത്…. നിരവധി തവണ ആവർത്തിച്ച കണ്ടിട്ടും കുഞ്ഞാലിയുടെ മനസ്സ് കവരാനുള്ള ഈ അഭിനയ തസ്ക്കരന്റെ വിദ്യ എന്താണെന്ന് ഒരു അഭിനയ വിദ്യാർത്ഥി എന്ന നിലക്ക് ഞാനിപ്പോഴും അന്വേഷിച്ചു കൊണ്ടിരിക്കുകയാണ്… ആയോധനകലയിലെ പുലികളായ ഒരു പാട് ശരീരഭാരമുള്ള കളരിഗുരുക്കൻമാരെ കണ്ട വടക്കൻ കളരിയുടെ നാട്ടിൽ നിന്ന് വരുന്ന എനിക്ക് ഈ ബോഡി ഷെയിമിംങ്ങിനെ അറിവില്ലായ്മയായി മാത്രമെ കാണാൻ പറ്റുകയുള്ളു… ലാലേട്ടാ വിണ്ടും ഒരു ലാൽ സലാം…”.