ഗപ്പി സംവിധായകന്റെ അടുത്ത ചിത്രത്തിൽ പൃഥ്വിരാജ് സുകുമാരൻ; കൂടുതൽ വിവരങ്ങളിതാ..!

ഗപ്പി എന്ന ടോവിനോ ചിത്രമൊരുക്കിയ വലിയ ശ്രദ്ധ നേടിയ സംവിധായകൻ ആണ് ജോൺ പോൾ ജോർജ്. അതിനു ശേഷം സൗബിൻ ഷാഹിർ നായകനായി എത്തിയ അമ്പിളി എന്ന ചിത്രവും അദ്ദേഹം സംവിധാനം ചെയ്തിരുന്നു. ഇപ്പോഴിതാ, അദ്ദേഹം ഒരുക്കാൻ പോകുന്ന പുതിയ ചിത്രത്തിൽ പൃഥ്വിരാജ് സുകുമാരൻ ആണ് നായക വേഷം ചെയ്യാൻ പോകുന്നത് എന്ന് പ്രഖ്യാപിച്ചിരിക്കുകയാണ് ചിത്രത്തിന്റെ നിർമ്മാതാവായ ആഷിക് ഉസ്മാൻ. ആഷിക് ഉസ്മാൻ പ്രൊഡക്ടിൻസിന്റെ ബാനറിൽ അദ്ദേഹം ഒരുക്കാൻ പോകുന്ന അഞ്ചു വലിയ ചിത്രങ്ങളിൽ ഒന്നാണ് ഈ പ്രൊജക്റ്റ്. ബിഗ് ബഡ്ജറ്റ് ചിത്രമായി ഒരുക്കാൻ പോകുന്ന ഈ ജോൺ പോൾ ജോർജ്- പൃഥ്വിരാജ് ചിത്രത്തിന്റെ പ്രധാന ലൊക്കേഷൻ മാലിദ്വീപ് ആണെന്നും അദ്ദേഹം ക്യാൻ ചാനൽ മീഡിയയോട് പറഞ്ഞു.

ഇത് കൂടാതെ ഫഹദ് ഫാസിൽ അൽത്താഫ് സലിം ചിത്രം, എം സി ജിതിൻ- കുഞ്ചാക്കോ ബോബൻ ചിത്രം, മിഥുൻ മാനുവൽ തോമസ്- കുഞ്ചാക്കോ ബോബൻ ചിത്രമായ ആറാം പാതിരാ, ടോവിനോ തോമസ്- ഖാലിദ് റഹ്മാൻ ചിത്രമായ തല്ലുമാല എന്നിവയും ആഷിക് ഉസ്മാൻ നിർമ്മിക്കുന്നുണ്ട്. തല്ലുമാല ഉൾപ്പെടെ ഇതിനോടകം പന്ത്രണ്ടു ചിത്രങ്ങൾ നിർമ്മിച്ചിട്ടുണ്ട് ആഷിക് ഉസ്മാൻ. സൂപ്പർ ഹിറ്റായ അഞ്ചാംപാതിരയുടെ രണ്ടാം ഭാഗം അല്ലെങ്കിലും അതിലെ കേന്ദ്രകഥാപാത്രമായ അന്‍വര്‍ ഹുസൈനെ നിലനിര്‍ത്തി മിഥുൻ മാനുവൽ തോമസ് ഒരുക്കുന്ന ആറാം പാതിരായും ഈ വർഷം തന്നെ ഷൂട്ടിംഗ് ആരംഭിക്കും എന്നും അദ്ദേഹം പറയുന്നു. പൃഥ്വിരാജ് സുകുമാരൻ ചിത്രം ആയിരിക്കും ഈ ലിസ്റ്റിൽ ഏറ്റവും വൈകി തുടങ്ങാൻ സാധ്യത ഉള്ളത്. ആട് ജീവിതം എന്ന ചിത്രം തീരാൻ വൈകും എന്നതാണ് അതിനു കാരണമെന്നറിയുന്നു.