ബഹ്‌റൈനിലും വിജയ് സൂപ്പർ തന്നെ; വമ്പൻ വരവേൽപ്പ് നേടി ആസിഫ് അലി- ജിസ് ജോയ് ചിത്രം..!

ജിസ് ജോയ്- ആസിഫ് അലി ടീം മൂന്നാമതും ഒന്നിച്ച വിജയ് സൂപ്പറും പൗർണ്ണമിയും എന്ന ചിത്രം മലയാളത്തിലെ ഈ വർഷത്തെ ആദ്യത്തെ ബോക്സ് ഓഫീസ് ഹിറ്റായി മാറിയിരുന്നു. ന്യൂ സൂര്യ ഫിലിമ്സിന്റെ ബാനറിൽ സുനിൽ എ കെ നിർമ്മിച്ച ഈ ചിത്രം രചിച്ചതും ജിസ് ജോയ് തന്നെയാണ്. ഐശ്വര്യ ലക്ഷ്മി നായികാ വേഷത്തിൽ എത്തിയ ഈ പക്കാ ഫാമിലി കോമഡി എന്റെർറ്റൈനെറിനു ഗൾഫ് രാജ്യങ്ങളിലും വമ്പൻ വരവേൽപ്പ് ആണ് ലഭിച്ചത്. ചിത്രത്തിന്റെ വിജയാഘോഷത്തിൻറെ ഭാഗമായി ബഹറിനിൽ എത്തിയ അണിയറ പ്രവർത്തകർക്ക് ഹൃദയം നിറഞ്ഞ സ്വീകരണം ആണ് ആരാധകരും സിനിമാ പ്രേമികളും ചേർന്ന് നൽകിയത്. സംവിധായകൻ ജിസ് ജോയ്, ആസിഫ് അലി, ഐശ്വര്യ ലക്ഷ്മി, ബാലു വർഗീസ് എന്നിവർ അവിടെ നടന്ന ചടങ്ങിൽ പങ്കെടുത്തു.

ഗൾഫിലും മികച്ച ബോക്സ് ഓഫീസ് ഓപ്പണിങ് നേടിയ ഈ ചിത്രം ജിസ് ജോയ്- ആസിഫ് അലി കൂട്ടുകെട്ടിന്റെ തുടർച്ചയായ രണ്ടാം സൂപ്പർ ഹിറ്റാണ്.  സൺ‌ഡേ ഹോളിഡേ എന്ന വിജയ ചിത്രമാണ് ഇവർ ഇതിനു മുൻപേ സമ്മാനിച്ചത്. വൈകാരിക മുഹൂർത്തങ്ങളും കുടുംബ ബന്ധങ്ങളും നർമ്മവും പ്രണയവും എല്ലാം ചാലിച്ചൊരുക്കിയ വിജയ് സൂപ്പറും പൗര്ണമിയും കുടുംബ പ്രേക്ഷകരാണ് ആഘോഷമാക്കുന്നതു. സിദ്ദിഖ്, രഞ്ജി പണിക്കർ, കെ പി എ സി ലളിത, ദേവൻ, ശാന്തി കൃഷ്ണ, ബാലു വർഗീസ്, ജോസഫ് അന്നംക്കുട്ടി, അജു വർഗീസ് എന്നിവരും അഭിനയിച്ചിരിക്കുന്നു ഈ ചിത്രത്തിന് ഗാനങ്ങൾ ഒരുക്കിയത് നവാഗതനായ പ്രിൻസ് ജോര്ജും പശ്ചാത്തല സംഗീതം ഒരുക്കിയത് ടീം ഫോർ മ്യൂസിക്‌സും ആണ്. റെനഡിവേ ദൃശ്യങ്ങൾ ഒരുക്കിയ ഈ സിനിമ എഡിറ്റ് ചെയ്തത് രതീഷ് രാജ് ആണ്.