ഹൊറർ കോമഡി ചിത്രം വീണ്ടും കേരളത്തിൽ വിജയ തരംഗം സൃഷ്ടിക്കുന്നു; ഗംഭീര പ്രതികരണവുമായി നീലി മുന്നോട്ടു..!

ഒരിടയ്ക്ക് കേരളത്തിലെ പ്രേക്ഷകർ ഏറെ ഇഷ്ടപ്പെട്ടിരുന്ന ഒരു സിനിമാ വിഭാഗമാണ് ഹൊറർ കോമഡി. എന്നാൽ തുടർച്ചയായി നിലവാരമില്ലാത്ത ചിത്രങ്ങൾ ആ പേരും പറഞ്ഞു പടച്ചു വിട്ടപ്പോൾ അത്തരം ചിത്രങ്ങൾ പ്രേക്ഷകർ തിരസ്കരിച്ചു. പിന്നീട് നമ്മൾ കണ്ടത് ഇംഗ്ലീഷ് സിനിമകളുടെ മോഡലിൽ ഒരുക്കിയ പക്കാ ഹൊറർ ഫിലിംസ് ആണ്. ഹാസ്യം എന്ന ഘടകത്തെ എടുത്തു കളഞ്ഞു, പേടിയും ആകാംഷയും മാത്രം നൽകുന്ന ആ ചിത്രങ്ങളും മലയാളി പ്രേക്ഷകർ സ്വീകരിച്ചു. ഇപ്പോഴിതാ ഹൊറർ- കോമഡി ചിത്രങ്ങൾ മലയാള സിനിമയിലേക്ക് തിരിച്ചു വന്നു കഴിഞ്ഞു. കഴിഞ്ഞയാഴ്ച ഇവിടെ റിലീസ് ചെയ്ത നീലി എന്ന ഹൊറർ- കോമഡി- മിസ്റ്ററി ചിത്രം വലിയ വിജയമാണ് തീയേറ്ററുകളിൽ നേടുന്നത്. മമത മോഹൻദാസ്, അനൂപ് മേനോൻ , ബാബുരാജ്, ശ്രീകുമാർ, സിനിൽ സൈനുദീൻ എന്നിവർ അഭിനയിച്ച ഈ ചിത്രം ഗംഭീര പ്രേക്ഷക പ്രതികരണമാണ് നേടിയെടുക്കുന്നത്.

ഹൊററും കോമഡിയും മിസ്റ്ററിയും കൃത്യമായ അളവിൽ കോർത്തിണക്കി ഒരുക്കിയ ഈ ചിത്രം സംവിധാനം ചെയ്തിരിക്കുന്നത് നവാഗതനായ അൽതാഫ് റഹ്മാനും ഇതിനു തിരക്കഥ രചിച്ചത് റിയാസ് മാറാത് മുനീർ മുഹമ്മദുണ്ണി എന്നിവർ ചേർന്നുമാണ്. സൺ ആഡ്‌സ് ആൻഡ് ഫിലിം പ്രൊഡക്ഷൻസിന്റെ ബാനറിൽ സുന്ദർ മേനോൻ നിർമ്മിച്ച ഈ ചിത്രം മികച്ച നിരൂപണങ്ങൾ നേടുന്നതിനൊപ്പം ബോക്സ് ഓഫീസിലും വലിയ കുതിപ്പ് തന്നെയാണ് നടത്തുന്നത്. ബാബുരാജ്- ശ്രീകുമാർ ടീമിന്റെ കിടിലൻ കോമഡി രംഗങ്ങളും അനൂപ് മേനോൻ, സിനിൽ സൈനുദീൻ ടീമിന്റെ രസകരമായ പ്രകടനവും ഈ ചിത്രത്തിന് മുതൽക്കൂട്ടാണ്. മമത മോഹൻദാസ് ചിത്രത്തിലെ കേന്ദ്ര കഥാപാത്രമായി ഗംഭീര പെർഫോമൻസാണ് കാഴ്ച വെച്ചിരിക്കുന്നത്. ബേബി മിയ , രാഹുൽ മാധവ് എന്നിവരും ഈ ചിത്രത്തിലെ താര നിരയിൽ ഉണ്ട്. ക്യാമറാമാൻ മനോജ് പിള്ളൈ, എഡിറ്റർ വി സാജൻ , സംഗീത സംവിധായകൻ ശരത് എന്നിവർ ചേർന്ന് സാങ്കേതികമായും ഈ ചിത്രത്തെ മികച്ച ഒരനുഭവമാക്കി തീർത്തു. നിലവാരമുള്ള ഹൊറർ- കോമഡി ചിത്രങ്ങൾ സമ്മാനിച്ചാൽ അവ തങ്ങൾ ഇരു കയ്യും നീട്ടി സ്വീകരിക്കും എന്ന് ഒരിക്കൽ കൂടി കാണിച്ചു തന്നിരിക്കുകയാണ് മലയാളി സിനിമാ പ്രേക്ഷകർ.