കുട്ടികളുടെ മനം കവരാൻ പ്യാലി എത്തുന്നു; റിലീസിനൊരുങ്ങി ദുൽഖർ അവതരിപ്പിക്കുന്ന പുതിയ ചിത്രം

മലയാളത്തിന്റെ സ്വന്തം ദുൽഖർ സൽമാൻ അവതരിപ്പിക്കുന്ന പ്യാലി എന്ന ചിത്രം ജൂലൈ എട്ടിന് തീയേറ്ററുകളിലെത്തുകയാണ്. ഈ കഴിഞ്ഞ മെയ് മാസം പ്രഖ്യാപിച്ച കേരളാ സംസ്ഥാന ചലച്ചിത്ര അവാർഡിൽ കലാസംവിധാനത്തിനും ബാലതാരത്തിനുമുള്ള അവാർഡുകൾ കരസ്ഥമാക്കിയ മലയാള ചിത്രം കൂടിയായ പ്യാലി, ദുൽഖർ സൽമാന്റെ നിർമ്മാണ- വിതരണ ബാനറായ വേഫെറർ ഫിലിംസിന്റെയും അന്തരിച്ചു പോയ നടൻ എൻ എഫ് വർഗീസിന്റെ സ്മരണാർത്ഥമുള്ള എൻ എഫ് വർഗീസ് പിക്ചേഴ്‌സിന്റെയും ബാനറിൽ, ദുൽഖർ സൽമാനും സോഫിയ വർഗീസും ചേർന്നാണ് നിർമ്മിച്ചിരിക്കുന്നത്. നേരത്തെ ഈ ചിത്രത്തിന്റെ രസകരമായ ടീസറും പുറത്തു വന്നിരുന്നു. സഹോദരബന്ധത്തിന്റെ ആഴവും വ്യാപ്തിയും മനോഹരമായി അവതരിപ്പിക്കുന്ന ഒരു ചിത്രമായിരിക്കുമിതെന്നാണ് ഇതിന്റെ ടീസർ സൂചിപ്പിക്കുന്നത്. പ്യാലി എന്ന ഒരു കൊച്ചുമിടുക്കിയെ കേന്ദ്രീകരിച്ചാണ് ചിത്രത്തിന്റെ കഥ മുന്നോട്ട് സഞ്ചരിക്കുന്നതെന്നും ഈ ടീസർ നമ്മുക്ക് കാണിച്ചു തന്നു.

ഏതായാലും ഈ ടീസർ മികച്ച പ്രേക്ഷക നേടിയതോടെ തന്നെ ചിത്രത്തെ കുറിച്ചുള്ള പ്രതീക്ഷകളും വർധിച്ചിട്ടുണ്ട്. ബാർബി ശർമ്മ, ജോർജ് ജേക്കബ്, ശ്രീനിവാസൻ, മാമുക്കോയ, അപ്പാനി ശരത്, റാഫി, അൽത്താഫ് സലിം, സുജിത് ശങ്കർ, ആടുകളം മുരുഗദോസ് എന്നിവർ പ്രധാന കഥാപാത്രങ്ങളെയവതരിപ്പിക്കുന്ന ഈ ചിത്രം നവാഗതരായ ബബിതയും റിനും ചേർന്നാണ് രചിച്ചു സംവിധാനം ചെയ്തിരിക്കുന്നത്. ഈ ചിത്രത്തിന്റെ മോഷൻ പോസ്റ്റർ, ടീസർ, കാരക്ടർ പോസ്റ്ററുകളെന്നിവയും ടൈറ്റിൽ ഗാനവും പ്രേക്ഷകരുടെ മുന്നിലെത്തുകയും സൂപ്പർ ഹിറ്റായി മാറുകയും ചെയ്തിരുന്നു. ജിജു സണ്ണി ദൃശ്യങ്ങളൊരുക്കിയ ഈ ചിത്രത്തിന്റെ എഡിറ്റിങ് നിർവഹിച്ചത് ദീപു ജോസഫ്, ഇതിനു സംഗീതമൊരുക്കിയത് പ്രശാന്ത് പിള്ളൈ എന്നിവരാണ്. കുട്ടികളുടെ മനം കവരുന്ന ഒരു കഥയാണ് ഈ ചിത്രം പറയുന്നതെന്നാണ് സൂചന.